محمود رضا

محمود رضا

تاريخ القصة: 23/2/2015

بقالي سنتين ما كتبتش إيميلات والنهاردا أعتقد جه الوقت اللي أكتب فيه ايميل

بادئ زي بدء أنا كنت مقدم في شركة صناعية والحمدالله اتقبلت وهبدأ شغل معاهم شهر مارس بإذن الله وتقريبا بضعف مرتبي الحالي 🙂

الحكاية بدأت من موقع اسمه شغلانتي للوظايف وده موقع للوطن العربي كله تقدر تلاقي فيه كل إعلانات الجرايد في فترة معينة اللي طلبت وظيفة معينة يعني م الاخر تلاقي وظيفتك في كل الجرايد كإنك اشتريتهم كلهم ووصلت لوظيفتك في كل جريدة بزرار واحد

فضلت أقدم لمدة سنة تقريبا ومفيش أي حاجه مناسبة جاتلي غير شغلانة واحدة وكانت شركة اصغر بس المرتب أكتر شويه ولإن مش ده بس المقياس اللي بدور عليه فرفضت

وفضلت كده لحد ما جالي شعور إن ممكن يكون الإيميل بتاعي أنا نفسه اللي فيه مشكلة وإنه مش بيبعت لحد ما جالي تليفون من 3 أسابيع

الشركة : أستاذ محمود

أنا : ايوه يافندم

الشركة : معاك شركة ABC WZ أنت كنت قدمت السي في بتاعك

أنا : !!! ممم اه

الشركه : عندك إنترفيو بكره باذن الله الساعة 12

أنا : تمام طب ممكن العنوان

الشركة : العنوان تك تك تك تك ترك

أنا : تمام معلش ممكن اسم الشركه تاني

الشركة : ABC WZ في انتظارك

أنا :شكرا

ابتسامة ثقة كده وقومت مدور في جوجل على الشركة دي وكمان في السوشيل ميديا – وقعدت أجمع معلومات عنها و قدرت أحدد هي شركة كبيرة ولا صغيرة ومين منافسينهم في السوق كمان وذاكرتهم كويس

روحت الانترفيو تاني بدري شويه والسكيرتيره ردت عليا بعدها بشويه إن مدير الحسابات هيتأخر ساعه إلا ربع يمكن لو حد غيري هيزعل أنا بالعكس فرحت جدا لإني كده جبت فيه جون من قبل المقابلة وهيضطر يعتذرلي ومن هنا أخد زمام المبادرة وأكمل عليه في المقابلة

وصل فعلا متأخر وحصل كل اللي كنت بفكر فيه وبدأنا المقابلة وحكيتله نظام شغلي إيه وبعمل إيه من طقطق لسلامو عليكو بكل ثقه والـ

EYE CONTACT

وابتسامه ثقة…من الاخر فهم من المقابلة دي إني بعرف أعمل كل حاجة أو بمعنى أوضح أقدر أدير شركة (ماليا وحسابيا) بشكل منتظم وسليم ودي ليها قصة تانية لوحدها وإزاي بقيت عارف أعمل ده وأنا كنت صفر محاسبيا..(لو لقيت ناس عايزه مهتمة تعرفها ياريت يراسلوني إن بوكس الأول وأنا هعرضها هنا)

المهم خلصت المقابلة وكانت تقييمه ليا بالشكل ده

1-خبرتك ممتازة

2-ده بالظبط اللي محتاجينه وشغلك هيبقى كمان أقل من كده

3- الـــ (سي في) بتاعك جميل جدا

شكرته وقالي سعيد بمقابلتك وبإذن الله يكون في نصيب…مشيت من عنده وبعد دقيقتين لقيت رقم بيتصل بيا فرديت لقيته هو

هو : معلش أستاذ محمود نسيت أسألك انت ممكن تبدء شغل معانا من امتى لو في نصيب

أنا : حضرتك عارف القانون وإن لازم بعد 3 شهور

هو : لالا كتير ده احنا عاوزينك الإسبوع الجاي…ممكن تتكلم ودي في الشركة عندك إنك تمشي قبل كده؟

أنا : أحاول كده بإذن الله بس عشان أقدر أتكلم بكل ثقة ممكن أعرف تقريبا المرتب؟

هو : لن يقل عن تك تك تك ولو حد هنا كتبلتك أقل من كده أنا اللي هرفضلك ما تقلقش

أنا : وهو كذلك خلاص هكلم الإدارة المالية عندي وإن شاء الله خير

اتفاوضت عندي وتم الإتفاق على شهر مش 3 شهور ولقيت جايلي تليفون تاني إن عندي مقابلة كمان يومين مع المدير العام للمجموعة اللي أساسا بتتكون من 11 شركة صناعية في مجالات مختلفة

وفعلا روحت ونفس السيناريو اتكرر إن الراجل ده كمان هيتأخر شويه قولت يا بركة دعاكي يا حجة 😀

وصل واعتذر و و وبدأنا المقابلة وتقريبا نفس سيناريو المقابلة الأولى بس قولتله معلومات عن شركتهم وإنها بدأت امتى مزاولة النشاط بس للأسف ماعندكمش سوشال ميديا قالي عندك حق وأنا عينت واحد الفترة دي عشان الموضوع ده وتحديث الويب سايت وكده فجبت هاتريك مثلا من أول التأخير مرورا بالإنترفيو وكمان معلومات الشركه والسوشيال ميديا لحد ما وصلنا للمرتب وعرض عليا بما يعادل 1500 جنيه أقل قولتله العرض مش كده قالي اعتبره كده وإن ده الوضع اللي هنمشي عليه قولتله لا آسف مش هقبل لإن الوضع ده يادووووب أوافق بيه مش هقدر بأقل من كده….بص في السقف 5 ثواني وغمض عينه وقالي (مبروك!! شوفت أسرع من كده انترفيو – وابتسم) ابتسمت وقولتله الصراحه لا 🙂

اتصل بالسكرتيره وكتبت الجوب أوفر بس قبل ما يتمضي اتصل بواحد وان لازم يقابلني ويديلو التقرير النهائي عني وده اللي هيبقى من الاخر مديري المباشر وخلصت المقابلة على كده وبعدها بشوية كلمت المدير ده فعلا واتفقنا على موعد في نفس اليوم إني أقابله فيه

روحت ع الموعد وقابلته ونفس اللي قولتله في المقابلتين هو هو بس لقيته مايل للتكاليف فدوست معاه شويه فيها بما إن ده ملعبه وطلعت من المقابلة بالنقاط دي

1-خبرتك كويسة

2-أنت فاهم لغتي (يعني فاهم دماغه)

3-لغتك الإنجليزية ممتازة وشكلك كويس

4-الشركة الحالية خسرتك وما عرفتش تقّدرك صح

ووراني مكتبي وجزء من المصنع بس لضيق الوقت

فضلت متابع حوار الجوب أوفر بتاعي مع السكرتيره لمدة أسبوع تقريبا وشكيت يكون غيروا رأيهم ولا حاجة فقومت متصل على المدير المباشر اسأله قالي ماتقلقش أنا ما قابلتش حد بعدك خلاص

وفعلا بعدها بكام يوم اتصلوا بيا إني استلم الجوب اوفر وف نفس اليوم كنت مقدم استقالتي في الشغال الحالي وابدأ أعد شهر من تاريخه ويكفي إني أقولكم إن اللي هيستلم بعدي 3 مش 1 كل واحد منهم هيمسك حاجه معينة من شغلي

——————-

اللي عاوز أقوله لأي حد ربنا كرمه وقدر يقرأ كل اللت والعجن بتاعي ده إني سقطت في تجارة سنتين وطالع بتقدير مقبول وكنت انجليش 3 من 10 بس الحمدالله ربنا ما بيضيعش أجر من احسن عملا…اجتهد وظبط مهاراتك ولغتك وماتقلقش لو الفرصة بعد كده اتأخرت عليك لإن كل مرحلة ليها وقتها وبردو ما وصلتش لوضع كويس كده إلا بعد 5 سنين تقريبا منهم سنة في معا وهي حجر الأساس..بشكر الباشمهندس وبدعيله ربنا يكرمه دايما وبدعي لكل واحد مجتهد بجد إنه يحقق اللي بيتمناه وإنه يصبر مع السعي…بالتوفيق