سارة الشرقاوي

سارة الشرقاوي

سلام عليكم ورحمة الله وبركاته

إزيكم يا معاً

إوعوا تكونوا نسيتوني

يااااه ..كدة برضه؟؟؟؟؟؟؟

أنا اللي الدفعة اللي فاتت كنت عمالة أقولكوا نفسي أبقى معاً

أيوووة ..

أنا اللي محرمتش حتى بعد السبع أقلام

أنا اللي معاً فضلت تتسرب كدة من غير ما أحس جوة دمي

وفجأة لقيتني بقيت مدمنة ومليش حل غير حاجة من إتنين يا إما أحضر محاضرات معاً ..

يا إما أشوف الناس بتوع معاً كدة وأتفرج على تحركاتهم اللي مش بتقف أبداً

اللهم لا حسد يعني

المهم .. أنا غصب عني سبت معا شوية .. وهقولكوا ليه بس المهم إني مكنتش بدلع ولا حاجة

بس الفكرة ..إني وأنا قاعدة في المحاضرة إكتشفت إن فيه نوعين من الناس قاعدين معايا

ناس بتسمع ويعجبهم الكلام وترجع بيتها تنام وشكرا

وناس تانين.. بتتحرك وبتطبق كل كلمة بتتقال فى المحاضرة

( وأنا بقى مش هقولكوا الفرق أنا هدخل على طوووووول في المهم )

ببساطة أنا قررت أطبق وأنفذ كل كلمة بيقولها البشمهندس بالحرف وعندي أسبابي

أولاً : لأن جالي يقين إني هنجح أكيد في يوم من الأيام ..

أصل اللي بيعمل اللي عليه ربنا هيجازيه فعلا خير ومش هيضيع تعبه.

ثانياً : لأني في معاً عرفت حاجات في فترة قليلة أوي

و لو كنت فضلت أدور عليها لوحدي يمكن كنت هاخد سنين على ما أعرفها

..ويمكن كمان من غير معاً مكنتش أصلاً هدور عليها لأنها

مكنتش هتيجي على بالي ولا هفكر فيها.

ده كفاية إن كل كلمة كانت بتقال كانت بتضيفلي إضافة مش قليلة.

معلش بقى أنا برغي كتير .. بس إنتوا أصلكوا وحشتوني

المهم إني جاية النهاردة أحكيلكوا على أول خطوة في سلم نجاحي

اللي محققتش غيرها وفرحانة أوي بيها ..

لأنها بداية مفرحاااااني أوي وفتحت نفسي للخطوة الجاية بإذن الله

شوفوا بقى أنا بعد ما قررت أسمع الكلام اللي بيقولوا البشمهندس ..

وأصدق كدة وأبطل بقى لماظة و كسل.. لقيته بيقول يا جماعة قدموا على منحة جيل المستقبل ..

وعمال يأكد أوي وأنا أصلاً مش مقتنعة بيها دول بيقولوا هناخد أوفيس وإنجليزى

آه يعنى كلام فارغ وتضيع وقت ..

وهنفضل بقى 4 شهور رايح جاي وأنا أساساً عندي شغل

بصراحة لقيت الحكاية مملة بس المشكلة إني بثق في معاً أوي .. وهما في معاً بيأكدوا عليها ..

وبعدين أنا عارفة ومتأكدة إنهم لما يقولولي على مكان روحيه يبقى مش هيضيعوا وقتي ..

وإني في السكة لهناك أكيد هتكعبل في كنز فضلت كدة كتير محتارة وعمالة أفكر ..

وآخر ما زهقت روحت للبشمهندس أسأله هو بقى راح مديني كلمتين جامدين ..

لا نسيتهم .. ولا هنساهم طول عمري .. ولا هنساه بسببهم

قالي …

” عشان تتقبلي في أي مكان محترم إنتي محتاجة كمبيوتر وإنجليزي يكون معدي ..

طيب حلو …

إنتى مش هتقدري تدفعي فلوس كتير في كورس إنجليزي ..

بسيطة إدفعى مجهود كتير بدل الفلوس ..وإدفعي تعب …

لو .. لو إنتي عايزة فعلاً تنجحي ..”

قالي ..

” خدي إنجليزي في جيل المستقبل وذاكري .. وخليكي زي أبو تريكة

وخليكي فاكرة إنه أول ما لعب كورة مكنش بيلعب في الأهلي ..

لالالالالا .. ده لعب في ناهية .. وبعدين في الترسانة .. وبعدين الأهلي “

قالي …

” هما إيه اللي هيخليهم يرفضوكي في أي شركة يعني عشان إيه ؟؟؟

عشان إنتي بنت ؟؟

ولا عشان إنتي بتلبسي نقاب؟؟؟

” أنا أصلي نسيت أقولكوا إني بلبس نقاب المهم

قالي …

” وإيه يعني كل ده … ما هو ميسى عنده غدة .. ومع ذلك بيلعب …

أصل هو ميسى …

عايزة تتقبلي في أي مكان ؟؟؟؟؟؟

خليكي ميسي … زودي مهاراتك وخلي الشركات هي اللي تبقى عايزاكي

” أنا أخدت الكلمتين دول وروحت مقدمة في جيل المستقبل ..

ولما جيه معاد الإنترفيو فضلت أذاكر إنجليزي عشان أعديه ..

ولما إتقبلت كنت مسائي من الساعة 3 يعني .. أصلى كنت بشتغل في مدرسة

وكنت طبعاً بروح الكورس بعد الشغل ولما الكورس إبتدى لقيت نفسي هحتاج وقت

وهضطر أتأخر عن الكورس .. وهما من ساعة ما قدمت

وهما بيتكلموا عن القوانين ومش عارف إيه

بس الحقيقة إن طلع فيه إستثناءات ..

ولما إتكلمت معاهم لقيت الناس متفهمين أوي … وبيقدروك أوي أوي طول ما أنت مش بتدلع .

بس بصراحة .. وبينى وبينكوا لقيت إن تأخيرى ده هيأثر عليا أنا ….

وغير إن يوم كان كله الصبح شغل وبعد الظهر الكورس .. فمكنتش بدي المذاكرة حقها …

وبعد شوية تفكير ..

سبت الشغل ورب ضارة نافعة

صحيح زعلت أوي على شغلي وزمايلي … وزعلت أكتر إنى رجعت آخد مصروفي من بابا تاني

لكن كنت خلاص نفذت واللي حصل حصل

بعد كدة قررت أعوض بقى اللي فاتني وأذاكر كويس ..

مش بس كدة أنا بقيت أحضر قبل ما أروح وأفضل أطلع الكلمات الجديدة وأترجمها من جوجل

( الله يمسيك بالخير يا بشمهندس أسامة)

أنا كنت بروح مذاكرة الدرس قبل ما اخده ..

وكنت باخد درجات زيادة بقى عشان التحضير والمذاكرة وكدة

غير كدة كنت شاطرة في البزنسس .. وده بقى سبببه إني معاً …

أصل معظم الكلام اللي قالوه أنا أخدته في
Advanced Maaan


لأ أنا أخدت أكتر منه كمان المهم …

أنا خلصت الكورس .. عملت كويس في الإنترفيو الأخير

( ربنا يمسيك بالخير يا بشمهندس محاضرة الإنترفيو عملت معايا شغل )

الإنجليزي بتاعي بقى مختلف تماماً ..

فعلاً فرق كبير أوي بيني دلوقتي وقبل ما أدخل الكورس

( ده أنا كنت غلبانة أوي)

بس على فكرة .. في ناس كتير أوي كانوا زمايلي في الكورس

لكن زي ما دخلوا .. زي ما خرجوا .. أنا وهما مختلفين في حاجتين بس

أولاً : إني معاً

ثانياً : إني قررت أبقى ميسي والأندية هي اللي تتهافت عليا

يووووووووووووووه  قصدي الشركات

صحيح آخر يوم ليا في الكورس كان 21/ 6

وصحيح برضه نفسي أنام بقى وأرتاح يجى شهرين

لكن إزااااااااااااااااااااااااااااااي؟؟؟؟؟؟؟

ده أنا معاً يا جماعة أنا عايزة أبقى ميسى

المهم نزلت تاني يوم وأمرى لله بقى

نزلت يا معاً في عز الشمس والدنيا كانت حر ع الاآآآآآخر

وكان معايا يجي 10 سيفيهات عمالة أوزع فيهم

وفي الآخر روحت برج التطبيقين

هناك بقى .. كل ما أقدم الـ CV في شركة يقولولي أسبوعين ونكلمك

في الدور الـ 16 فيه شركة كدة إنترناشيونال

أول ما وصلت هناك أخدوا السي في بتاعي وزحلقونى

أيووووووووووووووووووووة أنا إتزحلقت

عادي بتحصل في أحسن العائلات

بس بقى أنا أخدت بالي إن فيه ناس مستنية تعمل إنترفيو

روحت نزلت .. شربت بيبسي .. ومية … وروقت كدة وتمام التمام وروحت راجعلها تاني

قعدت أهزر معاها شوية و سألتها على حين فجأة …

هو أنا لييييييييييه مش هعمل إنترفيو زي اللي قاعدين دول؟؟؟؟؟؟

راحت قلبت لسانها يا معا .. وفضلت تتكلم إنجليزي

صحيح أنا إتخضيت أوي وكنت هعيط

لكن محدش أحسن من حد

روحت أنا كمان رديت عليها بالإنجليزي

راحت ابتسمت كدة …وراحت مديانى ورقة كدة إسمها أبليكيشن وراحت قايلالي بالعربي

إملي دي يا سارة عشان هنعمل الإنترفيو لما تخلصيها

وأنا بملى الأبليكيشن إفتكرت البشمهندس لما كان بيقول ” زن “

( حقيقي مش عارفة أدعيله بإيه طيب)

المهم عملت الإنترفيو .. وكان الحمد لله سهل أوي وقالتلي إني إتقبلت …

وإني هبدأ التدريب .. وإن مرتبي هيوصل لـ2200 ولما فكرت كمان مع نفسي ..

لقيت إني همارس الإنجليزي طول الوقت وفي نفس الوقت المواعيد من الساعة 4 ..

يعني هقدر أذاكر باليل . وأروح إنترفيوهات بالنهار أو كورسات لو عايزة ..باذن الله يعني

ولما خلصت جيت أقولكوا اللي حصل ده بإختصار…


أنا بنت بلبس نقاااااااااااااااب

و اسوووووووووود

وخريجة معهد

كنت بعرف إنجليزى على قدي كدة وها أنا ذا سلكت طريقى .. ومش ههدى غير لما أبقى ميسى

وربنا حط قدامي معاً عشان تبقى السبب الأول في إني أنجح

أنا إبتديت ودي كانت أول خطوة

ولسة عندي أهداف كتير

ولسة هنجح تاني وهاجي أقولكوا برضه

معلش لو كنت طولت عليكوا بس آخر حاجة هقولهالكوا قبل ما أمشي

أنا بجد بجد بجد فخوووووووووووووووووورة أوي

لأنــــــــــي مـــــــعــــــــا