محمود حبيب

محمود حبيب 

السلام عليكم ورحمة الله وبركاته ازيكم يا احلى شباب عاملين ايه 🙂

يارب تكونوا بألف خير وصحة وسعادة بمناسبة الاعلان عن بدء الدفعة 15 لفريق معا

وبمناسبة وصول عدد أعضاء ل 25 ألف مستفيد بعتلكم الرسالة دى 🙂

من فترة وانا عايز اكتبلكم الخطوات اللى بحققها فى مسيرة قصة نجاحى بس بتردد واوقات بقول مش هتفي

د وفى الاساس انها من وجهة نظرى انها خطوات فى طريق النجاح لكن مقدرش اقول عليها انها قصة نجاح

لان قصة النجاح دى حاجة كبيرة ممكن نقولها فى نهاية مشوار حياتنا او عند نقطة تحول جزرية فى حياتنا الاجتماعية والوظيفية

سيبكم بقى من الرغى بتاعى دة وهجيبلكم من الاخر 🙂 واقول اللى عندى يمكن كلامى يفيد اى حد من بعدى 🙂

منا عارف الجيل البايظ دة (اللى انا منه) اللى كبر ومتعلمش ولا حب القراءة وعايزين اى حاجة ملخصات

لا دة كمان يريت تيجى تحقق حلمه وهدفه مكانه يبقى عملت اكبر جميلة :))

طبعا فى البداية لازم اشكر ربنا وكل اللى ليه الفضل عليا وساعدنى لغاية موصلت للى انا فيه دلوقتى

وأولهم طبعا والدتى الله يرحمها ووالدى وخطيبتى تسنيم والمهندس اسامة مؤسس فريق معا ولكل الناس اللى ساعدونى ووقفوا جنبى عشان منساش حد

هبتدى كلامى بمقولتين مؤمن بيهم 🙂 الفرق بين الانسان الناجح والآخرين هو ليس نقص القوة، ولا نقص المعرفة،

انما نقص الارادة 🙂 اسأل نفسك دائماً ماذا أُريد؟ لماذا؟ إذا عرفت الإجابة جيداً سوف · تعرف كيفية الوصول إلى مرادك بسهولة ويسر ·

تعرف على نفسك جيداً · اكتشف مهاراتك وحاول تطويرها وإستغلالها جيداً · تعرف على نقاط ضعفك وحاول التغلب عليها قدر الإمكان ·

استثمر الإمكانيات والموارد المتاحة لديك بقدر الإمكان · علِّم نفسك بنفسك · إذا طُلِبَ منك إنجاز مهمة معينة, لا تقل لا أعرف,

بل دون عنوانها والمدة المطلوبة لإنجاز هذة المهمة وابدأ بالبحث عن كل البيانات والمعلومات المتاحة حسب الإمكانيات المتاحة لديك

وأعرف جيداً أنه بالمثابرة والصبر يصبح ورق التوت حريراً · كن واثقاً من نفسك · أعلم جيداً أن رزقك لن يكون لأحد غيرك ,

المهم أن تسعى للحصول عليه بإيمان ويقين وتوكل 🙂 انا شكلى طولت عليكم …… خلاص انا هخش فى الموضوع عالطول 🙂

اول حاجة انا من أسرة متوسطة الحال وساكن فى بولاق الدكرور يعنى منطقة شعبية زى معظم الشباب مش فى منطقة راقية وف بقى معلقة دهب:)

انا قلت دة عشان محدش يتلكك انه غلبان وفقير وان اهله السبب والكلام دة كله الفقر مش عيب بس العيب انك تفضل زى ماانت

ومش عايز تغير نفسك وترمى عدم نجاحك على الاخرين 🙂 تعليمى تعليم حكومى من ابتدائى للجامعة ربنا يرحمها امى لما كانت بتودينى وتجيبنى من المدرسة 🙁

خريج كلية الشعب كلية تجارة 🙂 وبجد بجد بجد فخور انى كنت واحد منها اه متعلمناش زى باقى الخلق

بس الحمد لله طلعت منها بتقدير جيد نفعنى بعد كدة فى حياتى وشغل

ى فى هنا نقطتين عايز اوضحهم : اولا انى كنت علمى رياضة فى ثانوى وكنت شاطر فى تانية بس تالتة وقعتنى وعشان كدة دخلت تجارة وأفتخر 🙂

بدل انى كان نفسى اخش هندسة او حاسبات لانى بعشق الكمبيوتر

ثانيا والاهم اوعوا تسمعوا لكلام اللى شغالين واللى عمالين يقولوا الشغل غير اللى درستوه خالص …..

لالالالا دة كل اللى اتعلمناه فى الجامعة هو اللى موجود فى الشغل بس ممكن الاختلاف فى التطبيق لكن القواعد واحدة

ودى نصيحتى ليكم ……….. ركزوا فى الكلية واتعلموا منها كويس والتقدير يا شباب والله هيفرق معاكم كتير 🙂

طبعا بعد لما اتخرجت فى 2008 كان السى فى بتاعة ابيض 🙂 وكنت محتاج تأهيل واعداد عشان اقدر الاقى شغلانة كويسة ابدأ معاها مسيرة الحياة

خدت كورس اكسيل فى الجامعة وكان ساعتها مفيش ولا اى سى دى ال ولا الكلام دة

بس اول ما نزلت روحت اشتركت فيها وخدتها وبعدين واحد صاحبى كان فى فريق معا وعمال يقولى يابنى تعالى جرب محاضرة

وانا اقوله لا استنى مش وقته راح قايلى على فريق زدنى قولت تعالى نجرب روحت سجلت وخدت الكورس الاساسى الخاص بتطوير المهارات الشخصية

وبعد لما خلصت قولت انا لازم اروح اشوف فريق معا دة عبارة عن ايه اكيد احسن من زدنى

ما فريق معا هو اللى دلنى على زدنى من خلال صاحبى بس قولت أجلها لغاية ما اعرف حوار الجيش فى خلال الفترة دى

انا اتخرجت فى شهر 6 والجيش بتاعى لسة فى 11 قولت استغل الوقت دة انى اخد كورس جمعية جيل المستقبل

(ودى الحسنة الوحيدة اللى كانت من النظام الفاسد بيعملها للشباب)

-بس مش معنى كدة اننا نسكت على فساده- وفيه اتعلمت حاجات كتير

وطورت الانجليزى من خلال كورس بيرلتز اللى المستوى الواحد بتاعه يعدى ألف جنيه درست اربع مستويات دة غير الكمبيوتر

وبعض المهارات الشخصية من خلال سنتر ديل كارنجى ودة كورس اليوم الواحد ب 500 ج

واتعلمت ازاى اعمل مشروع واتعلمت مهارات البيع على اصوله ( البيع الصح مش اسرح ببضاعة فى الشارع 🙂 )

بس خلصت الكورس دة فى حوالى 4 شهور وساعتها كانت نتيجة الجيش ظهرت وخدت تأجيل ودلوقتى الحمد لله خدت الاعفاء النهائى

وطلعت بقى خلاص كدة انا ظبط الانجليزى والكمبيوتر والجيش اتحدد

وخلاص بقى مش ناقص غير الشغل فاصاحبى بتاع معا

قالى تعالى بقى فى محاضرة بكرة بعنوان اقتناص الوظائف فى ساقية الصاوى اعتقد فى نص الدفعة 6 فى فريق معا كانت فى اخر 2008

روحت وحسيت بذهول بجد بعتبر المحاضرة دى لغاية دلوقتى هى اهم محاضرة فى فريق معا انا خلاص اتعلمت وعايز اطبق اللى اتعلمته

ومعا هى اللى فتحت الباب قدامى عشان أطبق ومن ساعتها وانا خلاص عرفت الطريق

الطريق بكل بساطة محتاج حاجتين : معرفة قدراتك ومهاراتك وتطويرهم والحاجة التانية الهدف اللى حاطه لنفسك وقصاد عنيك عشان توصله

لو عرفت الحاجتين دول اكيد هتنجح وهتحقق اللى نفسك فيه 🙂 ومن ساعتها وانا فى فريق معا بقالى 3 سنين

فى البداية كنت بحضر واسمع المحاضرات بعد كدة كنت واحد من اللى بيفيدوا الشباب بالخبرات اللى اكتسبوها

استنوا دى مش دى النهاية لالالالالا

لسة بدرى دى مجرد البداية بس قبل ما اكمل فى نقطتين عايز اوضحهم :

الاولى : الانشطة التطوعية ودى بجد حاجة مهمة جدا جدا فى شخصية اى حد هتفرق معاك كتير

انا عن نفسى كنت عضو اتحاد طلاب فى كلية تجارة وكنت قائد لاسرة الشروق فى الكلية مش بس كدة شاركت فى كذا نشاط طلابى زى نيو فيجن وكدا

التانية : استغل الاجازات الصيفية فى العمل انا مش هتكسف انا اشتغلت ويتر فى كذا مطعم فى وقت الاجازات

طيب ليه وانت اهلك مش عايزينك تشتغل وعايزينك تعيش شبابك ولما تتخرج تبقى تشتغل اللى انت عايزه 🙂

الموضوع 4 اشياء : الاول انك بتتعلم المسئولية – تشيل مصروفات نفسك – تساعد اهلك – واهم حاجة انك تحس بقيمة نفسك 🙂

والسبب الخامس هى مقدار الخبرة اللى هتكتسبها وهتفرق معاك بعد التخرج 🙂

نرجع بقى للموضوع ونشوف عملت ايه بعد انضمامى لفريق معا فى غضون شهر الحمد لله كنت لقيت شغلانة فى شركة كمبيوتك

وكانت فرصة ليا انى اطبق كل اللى اتعلمته من انجليزى وكمبيوتر ومبيعات

لانى اشتغلت فى مجال المبيعات وخدت خبرة كويسة وكونت شبكة علاقات

وسبتها بعد 3 شهور وروحت شركة اكبر اسمها اسما جروب وقعدت فيها 6 شهور

وسبتها اصل مش دة المجال اللى راسمه لنفسى ولا عايز ابقى فيه عالطول بس السبب الاهم انى اتقبلت فى منحة الاى تى اى 🙂

ودة اللى كنت بجهز ليه من وانا لسة فى سنة 4 ومتخرجتش بس مضحكش عليكم

انا كان كل اللى اتمناه انى اخش منحة وزارة الاتصالات 9 شهور (MCIT)

اصلى مكنتش شايف انى هقدر احقق الشروط بتاعة الاى تى اى وكنت حاسس ان الاى تى اى صعب انى اخشها

وانى مش قدها بس المهم قدمت فيها وذاكرت الاى كيو بتاع البشمهندس اسامة وعملت الاختبارات والانترفيوهات وقولت اللى ربنا عايزه هيكون 🙂

  بس النتيجة ظهرت ومنجحتش :O 🙁 بس بعديها باسبوعين لقيتهم بيتصلوا بيا وقالولى انى فى قائمة الانتظار وان فى ناس اعتذرت وانت دخلت مكانهم 🙂 يااااااااااااااااااااااااااااااااه ساعتها كنت فرحان جدا وعرفت قيمة نفسى كويس دخلت الاى تى اى واتعلمت حاجات كتيييييييييييييييييييييييييييييييييييييييييييييييييييييييييييييييييييييييييييير

واتخرجت منها استشارى نظم تخطيط موارد المؤسسات ERP SAP FI/CO Consultant ودلوقتى انا شغال فى شركة Agile Business Solutions فى مدينة نصر والحمد لله قدرت احقق خطوات فى مشوار نجاحى وطبعا

فى نهاية كلامى زى ما ابتديت لازم اشكر ربنا وكل اللى ليه الفضل عليا وساعدنى لغاية موصلت للى انا فيه دلوقتى

وأولهم طبعا والدتى الله يرحمها ووالدى وخطيبتى تسنيم والمهندس اسامة مؤسس فريق معا

ولكل الناس اللى ساعدونى ووقفوا جنبى عشان منساش حد 🙂

معلش انا طولت عليكم بس يارب تستفيدوا من قصتى.

أخوكم /محمود حبيب

ان شاء الله هكون معاكم يوم الجمعة القادم فى أولى محاضرات الدفعة الجديدة