محمود رضا

محمود رضا 

بسم الله الرحمن الرحيم

والصلاه والسلام على أشرف المرسلين 

  

بداية احب اقول لمعا كل سنه وهي طيبه واشكر الباشمهندس وكل القائمين على معا إلي هي بيتي التاني انا اتعلمت كتير اوي في معا ومازلت بتعلم وهتعلم ومش هقدر انكر جميل اي حد عليا في معا في الي انا وصلتله بعد فضل ربنا عليا
——————————–

انا اسمي محمود رضا من المنصوره خريج كليه تجاره جامعه كفر الشيخ بتقدير مقبول بعد 6 سنين كمان محدش يحسد لو سمحتوا…. وانا في سنه رابعه الترم التاني الي هي سادس سنه ليا في الكليه كنت عاوز ابدء اخد شويه كورسات انجليش ومحاسبه بالأكسيل وهكذا وبالصدفه واحد صاحبي قالي على معا وانها فريق موارد بشريه قولتله مش ممكن اول كورس اخده في حياتي يبقى تنميه بشريه

قعد يقولي لا الموضوع مش كده ده كذا وكذا وتعالى نروح نجرب…دخلت الدفعه العاشره ومن يومها ماخرجتش لاني اكتشفت اني كنت صفر ع الشمال كنت لازم اضيع يوم قبل يوم معا عشان انام بدري ويوم معا كمان ضايع بره البيت واليوم الي بعد معا عشان كنت بروح الكليه بدري واجي جري اناااااااام يعني 3 ايام ضايعين مني بس في المقابل دي السنه الوحيده في حياتي الي جبت فيها تقدير في الكليه لاني كنت حاسس اني مبسوط جدا وفيا طاقه رهيبه عشان ابقى انسان أحسن وفعال خدت كذا كورس انجليش في مراكز رساله مع محاضرين امريكان وبدءت أقدر اكون كلمه جمب كلمه عشان اعرف اقول جمله على بعضها وهكذا يعني بدأت من الصفر

الفكره الي فرقت معايا انا شخصيا هي العصابه لاننا بقينا نقعد نذاكر مع بعض انجليش ونتعرف على أجانب ونجيبهم نعلمهم عربي ويعلمونا انجليش والي يعرف فينا او يسمع عن كورس يقول للباقي ونروح كلنا مع بعض فا في فتره قصيره جدا عملنا حاجات كتيره جدا

بعدها دخلت كذا منحه ICDL ومنحه جيل المستقبل الله يرحمها وكمان منحه الشركه من انجاز وكسبنا الحمدالله واخيرا خدت منحه التسويق في سوق العمل في اوتاد وكسبنا المسابقه برده الحمدالله غير ورش العمل الي كانت في اليونسيف وانجاز ومكتب (كي)

تطوعت في انشطه طلابيه داخل وخارج الجامعه وخدت كورسات كتير جدا في متطلبات سوق العمل زي المبيعات والتسويق والقياده وغيرها

قدمت بعد كده على شغل جالي الحمدالله شغل في فودافون وصله على 2200 اول 3 شهور و2800 بعد كده عشان بس كانوا محتاجين انجليش كويس ولازم يكون مدارس لغات ولما الاتش ار سمعني وانا بتكلم انجليش قالي اتقبلت في اول انترفيو ونسي خااااالص انا مدرسه حكومي ولا معايا محو اميه ولا ايه
المشكله الي قابلتها بعد كده انهم هيربطوني بعقد لمده سنه وانا كان جالي فرصه سفر للكويت ولكن شرطها الأساسي اجاده اللغه الأنجليزيه برده وبناء عليه اتطلب مني اروح فرع الشركه الكويتيه الي في مصر عشان افهم طبيعه شغلهم وسافرت بعدها 3 شهور

روحت هناك اشتغلت كويس جدا خلال الفتره دي وف نفس الوقت مافضلتش ساكت قولت اشوف البلد نظامها ايه واقدم في الشركات يوم السبت الي هو اجاوزتي من الشركه والي للأسف اجازه ل70% من الشركات هناك بس اهو ادور واقدم في ال30% لعل وعسى ربنا يكرمني بحاجه منهم وفضلت قدمت بالظبط 5 سيفيهات كا محاسب في خمس شركات والحمدالله جتلي منهم شركه روحت بعدها عملت المقابله الشخصيه معاهم قبلوني مع اني لا خبره ولا تقدير ولا بتاع…

الفكره بس اني كنت قبل ما اجيلهم شغال في شركه كبيره اه مش في مجالي ولكن اللغه سهلتلي اني اتواجد فيها واجي بعدين الشركه الجديده دي الأنترفيو كسبته من اول جوله لما عرضت السيره الذاتيه بتاعتي الي كانت عباره عن 3 صفحات وقتها وتم ضغطها الى صفحتين دلوقتي وكمان قولتلتهم خبرتي في المحاسبه الي اكتسبتها من الانشطه التطوعيه الي كنت فيها غير اني خلصت الانترفيو باني ناوي اخد الــ CMA لان عندي طموح ابقى كذا وكذا
يعني من الاخر الكلام بتاع الباشمهندس اسامه الي هو الي فرق معايا جوه لانه اداني حاجه عن كل حاجه بعدها المدير المالي قالي بجد السي في بتاعتك ما شاء الله عليها

وبناء عليه تم تعييني مدقق داخلي لمده شهر ونص في الفتره دي عملت المستحيل عشان اثبتله اني عند حسن ظنه بعد الفتره دي تم ترقيتي لأكون محاسب مشتريات اخيييييييييرا هعمل قيود يوميه وحساب استاذ وميزان مراجعه وكشوف حساب وشيكات ودنيا كبييييييييره اوي كده يعني من الاخر اشتغلت تيكنكال ومش بس كده عملت المستحيل عشان اثبت للجميع اني كفء للمكان الجديد وبناء عليه تم اصدار قرار بصدور فيزا ليا على حسب الشركه ممكن نقول وفروا عليا بتاع 30000 الف جنيه مصري بالحركه دي وبأخد خبره كمان وحاليا انا شغال مدرس انجليش بعد الضهر اتمنى من ربنا انه يوفقني في طريقي ويوفق كل واحد نفسه يلاقي طريقه بجد اعمل الي عليك واسعى ربنا هيديك الي نفسك فيه في وقته وبترتيبه هو مش بترتيبك انت لان ببساطه عليا أن أسعى وليس عليا إدراك النجاح

بالتوفيق ياشباب