نيره

نيره

السلام عليكم ورحمة الله

إزيك ياباشمهندس ..

دي أول رسالة أبعتها لحضرتك وأنا في الحقيقة مش عارفة أشكرحضرتك إزاي لأن أي

كلمة شكر مش كفاية .. وأنا واثقة إن حضرتك متعود على الشكر والدعاء من أشخاص مثلي

لكن أنا نفسي أدعي لحضرتك وأقول

ربنا ينور طريقك في الدنيا والآخرة زي مانورت طريقنا

أنا حكايتى ببساطة إني واحدة زي أي واحدة

دخلت كلية العلوم لما لقيت إن مجموعي مايجبش إلا هي وتجارة

ولأن أنا ميولي علمية فأنا إخترت كلية العلوم ( مع كامل إلاعتذار لكلية التجارة )

وبدأت تايهة في الأقسام

مش عارفة مين.. فين… ليه …. وأنا ماكنتش حبة إني اشتغل في التحاليل الطبية فاخترت أبعد

قسم عن التحاليل وهو قسم البيوفيزياء

وفعلاً كنت بجيب درجات عالية مابين جيد جداً وإمتياز

لكن المشكلة إني ماكنتش فاهمة هخرج منه أعمل إيه

… زي معظم الشباب اللي بيدخلوا كليات و أقسام ومش فاهمين أي حاجة غير الملزمة اللي قدامهم

اللي يدخلوا بها الإمتحان ويجيبوا تقدير أو حتى هيطنشوها و راضيين بالمقبول

والإتنين في رأيي مايتخيروش عن بعض

لأن الإتنين مش فاهمين حاجة ومش فاهمين همه هيتخرجوا ينيلوا إيه في عيشتهم ؟؟؟

المهم اتخرجت

ربنا وقعني في واسطة وقعتلي من السما .. والواسطة ده خلتنى أشتغل في مركز

من أكبر المراكز البحثية الحكومية اللي في مصر

بس عقد مش تعيين وطبعاً كنت طايرة من الفرحة إني هبقى واحدة

من الباحثين اللي في مصر .. وأنا اللي هعمل وأنا اللي هسوي

وسع ياجدع أنا جيييييييييييييييييييت

أنا اللي هحل مشاكل البلد مشكلة مشكلة ..

أقعدوا إنتوا بس كده ومالكوش دعوة وإطمنوا

أصل أنااااا جيت

المهم علشان رغيت كتير معلش بس إستحملني

علشان ده أول رسالة ليه فسبني أطلع كل اللي ف قلبي

….. رحت المكان لقيت الناس مش بتعمل بحث علمي دول

بيعملوا سلطة..

بتنجان …

بطيخ أي حاجة إلا إنه يكون بحث علمي

وده طبعا نظراً للإمكانيات المنيلة بنيلة وقلة الميزانية وقلة المرتب

آه بمناسبة المرتب أنا كان مرتبي ولامؤاخذة باليومية

يعني ولا اللي بيبيعوا لمون ..

اليوم بأربعة جنيه ونص +

بدل وجبة زيهم

يبقى المجمووووووووووووووووع 9 جنية في اليوم .. يابلاش

لك أن تتخيل ياباشمهندس مفيش أي دعم لامادي ولاحتى معنوي

إني أطلع أبحاث محترمة ولا أي حاجة …

حسيت إني ضعت بكل ماتحملة الكلمة من معنى أنا ضعت ولقيتني مش هعرف أعمل حاجة …

لاهعرف أسكر وأنسى …. ولا أنحرف …..ولا حتى أشم كلة

قعدت سنة في المكان ده من أكئب سنين عمري على المستوى الشخصي

وأكيد العيلة اللي كأبتها

الحمد لله

لغاية أما فجأة لقيت معاااااااااااا

حسيت إني كنت تايهة ولقيت اللي أنا عاوزاه …. وأنا دخلت الدفعة العاشرة

تقريبا من التلت التاني

وكانت أول محاضرة ليه

Job Hunting

ماتتخيلش ياباشمهندس أثرت فيه أد إيه وشباب معاً أثروا فيه أد إيه …

واللي بيقول إن المحاضرات ده ممكن

تكون مهتمة بالسواد الاعظم اللي همه تجارة بس.. هقولهم

أن حتى لو إفترضنا وده مستحيل إنك مش هتستفيد حاجة …

لكن وجودي في مجتمع إيجابى لمدة 5 او 6 ساعات أسبوعياً بيخلي عند الواحد طاقة

إيجابية رهييييييييييييبة تخلي الواحد بكسر الجبال بإيديه

وفضلت متابعة مع حضرتك واشتركت في أعمال تطوعية عرفتها عن طريق معاً

وبقيت متابعة كل كلمة حضرتك بتقولها

ورحت ملتقيات توظيف كتير ليه ومش ليه واشتركت في موديلز ليه ومش ليه …

يعني أقعدت أخبط على كل الابواب

لغاية أما لقيت إعلان جامعة النيل ومنحة النانوتكنولوجي رحت وقدمت

وكانوا طالبين أوراق كتيره شهادات التخرج والتويفل و الجي أر أي ده

غير الإنترفيو وآخر ميعاد للتقديم كان في آخر أغسطس …

وفجأة بعد الإعلان بأسبوع يعني في شهر 5

قالوا إنهم عاوزين الورق ده يبقى جاهز في خلال 3أسابيع بالكتير ..

الصراحة كنت ناوية أيأس وأكبر

بس إفتكرت معاً وحضرتك وافتكرت حالي في شغلي ..

المهم

استعنت بالله وبدأت واحدة واحدة وكنت متابعة مع الأدمنز هناك والحمد لله

اتقبلت اتقبلت اتقبلت

كمساعد باحث بمرتب حوالى 1500 على ما أعتقد

وأخدت منحة ماجستير 100 % والدراسة هتبدأ إن شاء الله

من الأسبوع اللي جاي

أنا عارفة إني طولت جامد بس كنت حبة أشكر حضرتك وأدعيلك

لأنك أخدت بإيدى من تحت الأرض لغاية الحمد لله بدأت أعرف خطواتي

وأمشي على الطريق الصح

وأكيد أنا مكملة في معاً إلى الأبد لإني أنا رأيى إن دي

بداية القصة مش نهايتها

سلام عليكم وأشوف حضرتك على خير في محاضرات معاً

نيره