محمود رضا

محمود رضا

تاريخ القصة: 23/2/2015

بقالي سنتين ما كتبتش إيميلات وانهرده اعتقد جه الوقت إلي اكتب فيه ايميل

بادئ ذي بدء انا كنت مقدم في شركة صناعية والحمدالله اتقبلت وهبدء شغل معاهم شهر مارس باذن الله وتقريبا بضعف مرتبي الحالي 🙂

الحكاية بدءت من موقع اسمه شغلانتي للوظايف وده موقع للوطن العربي كله تقدر تلاقي فيه كل اعلانات الجرايد في فترة معينه إلي طلبت وظيفة معينة يعني م الاخر تلاقي وظيفتك في كل الجرايد كإنك اشتريتهم كلهم ووصلت لوظيفتك في كل جريدة بزرار واحد

فضلت اقدم لمدة سنة تقريبا ومفيش اي حاجه مناسبه جاتلي غير شغلانه واحده وكانت شركة اصغر بس المرتب اكتر شويه ولإن مش ده بس المقياس إلي بدور عليه فرفضت

وفضلت كده لحد ما جالي شعور ان ممكن يكون الإيميل بتاعي انا نفسه إلي فيه مشكله وانه مش بيبعت لحد ما جالي تليفون من 3 اسابيع

الشركة : استاذ محمود

أنا : ايوه يافندم

الشركة : معاك شركة ABC WZ انت كنت قدمت السي في بتاعك

أنا : !!! ممم اه

الشركه : عندك انترفيو بكره باذن الله الساعه 12

انا : تمام طب ممكن العنوان

الشركة : العنوان تك تك تك تك ترك

أنا : تمام معلش ممكن اسم الشركه تاني

الشركة : ABC WZ في انتظارك

أنا :شكرا

ابتسامة ثقة كده وقومت مدور في جوجل على الشركة دي وكمان في السوشيل ميديا – وقعدت أجمع معلومات عنها و قدرت احدد هي شركة كبيرة ولا صغيرة ومين منافسينهم في السوق كمان وذاكرتهم كويس

روحت الانترفيو تاني بدري شويه والسكيرتيره ردت عليا بعدها بشويه ان مدير الحسابات هيتأخر ساعه إلا ربع يمكن لو حد غيري هيزعل انا بالعكس فرحت جدا لاني كده جبت فيه جون من قبل المقابلة وهيذطر يعتذرلي ومن هنا أخد زمام المبادرة وأكمل عليه في المقابلة

وصل فعلا متأخر وحصل كل إلي كنت بفكر فيه وبدأنا المقابلة وحكيتله نظام شغلي ايه وبعمل ايه من طقطق لسلامو عليكو بكل ثقه والـ

EYE CONTACT

وابتسامه ثقة…من الاخر فهم من المقابلة دي اني بعرف اعمل كل حاجه أو بمعنى اوضح أقدر ادير شركة (ماليا وحسابيا) بشكل منتظم وسليم ودي ليها قصه تانيه لوحدها وازاي بقيت عارف اعمل ده وانا كنت صفر محاسبيا..(لو لقيت ناس عايزه مهتمه تعرفها ياريت يراسلوني ان بوكس الاول وانا هعرضها هنا)

المهم خلصت المقابله وكانت تقييمه ليا بالشكل ده

1-خبرتك ممتازه

2-ده بالظبط إلي محتاجينه وشغلك هيبقى كمان أقل من كده

3- الـــ (سي في) بتاعك جميل جدا

شكرته وقالي سعيد بمقابلتك وباذن الله يكون في نصيب…مشيت من عنده وبعد دقيقتين لقيت رقم بيتصل بيا فرديت لقيته هو

هو : معلش استاذ محمود نسيت أسألك انت ممكن تبدء شغل معانا من امتى لو في نصيب

أنا : حضرتك عارف القانون وان لازم بعد 3 شهور

هو : لالا كتير ده احنا عاوزينك الإسبوع الجاي…ممكن تتكلم ودي في الشركة عندك انك تمشي قبل كده؟

أنا  : أحاول كده باذن الله بس عشان اقدر اتكلم بكل ثقة ممكن اعرف تقريبا المرتب؟

هو : لن يقل عن تك تك تك ولو حد هنا كتبلتك اقل من كده انا إلي هرفضلك ما تقلقش

أنا : وهو كذلك خلاص هكلم الإدارة المالية عندي وان شاء الله خير

اتفاوضت عندي وتم الإتفاق على شهر مش 3 شهور ولقيت جايلي تليفون تاني ان عندي مقابله كمان يومين مع المدير العام للمجموعة إلي اساسا بتتكون من 11 شركة صناعيه في مجالات مختلفة

وفعلا روحت ونفس السيناريو اتكرر ان الراجل ده كمان هيتأخر شويه قولت يا بركة دعاكي يا حجة :D

وصل واعتذر و و وبدانا المقابلة وتقريبا نفس سيناريو المقابلة الاولى بس قولتله معلومات عن شركتهم وانها بدأت امتى مزاولة النشاط بس للأسف ماعندكمش سوشيل ميديا قالي عندك حق وانا عينت واحد الفترة دي عشان الموضوع ده وتحديث الويب سايت وكده فجبت هاتريك مثلا من اول التاخير مرورا بالإنترفيو وكمان معلومات الشركه والسوشيل ميديا لحد ما وصلنا للمرتب وعرض عليا بما يعادل 1500 جنيه اقل قولتله العرض مش كده قالي اعتبره كده وان ده الوضع الي هنمشي عليه قولتله لا اسف مش هقبل لان الوضع ده يادووووب اوافق بيه مش هقدر بأقل من كده….بص في السقف 5 ثواني وغمض عينه وقالي (مبروك!! شوفت اسرع من كده انترفيو – وابتسم) ابتسمت وقولتله الصراحه لا 🙂

اتصل بالسكرتيره وكتبت الجوب أوفر بس قبل ما يتمضي اتصل بواحد وان لازم يقابلني ويديلو التقرير النهائي عني وده إلي هيبقى من الاخر مديري المباشر وخلصت المقابلة على كده وبعدها بشويه كلمت المدير ده فعلا واتفقنا على موعد في نفس اليوم اني اقابله فيه

روحت ع الموعد وقابلته ونفس إلي قولتله في المقابلتين هو هو بس لقيته مايل للتكاليف فدوست معاه شويه فيها بما ان ده ملعبه وطلعت من المقابلة بالنقاط دي

1-خبرتك كويسه

2-انت فاهم لغتي (يعني فاهم دماغه)

3-لغتك الإنجليزية ممتازه وشكلك كويس

4-الشركة الحاليه خسرتك وما عرفتش تقّدرك صح

ووراني مكتبي وجزء من المصنع بس لضيق الوقت

فضلت متابع حوار الجوب اوفر بتاعي مع السكرتيره لمدة اسبوع تقريبا وشكيت يكون غيرو رأيهم ولا حاجه فقومت متصل على المدير المباشر اسأله قالي ماتقلقش انا ما قابلتش حد بعدك خلاص

وفعلا بعدها بكام يوم اتصلو بيا اني استلم الجوب اوفر وف نفس اليوم كنت مقدم استقالتي في الشغال الحالي وابدء اعد شهر من تاريخه ويكفي اني اقولكم ان إلي هيستلم بعدي 3 مش 1 كل واحد منهم هيمسك حاجه معينه من شغلي

——————-

إلي عاوز اقوله لأي حد ربنا كرمه وقدر يقرأ كل اللت والعجن بتاعي ده اني سقطت في تجارة سنتين وطالع بتقدير مقبول وكنت انجليش 3 من 10 بس الحمدالله ربنا ما بيضيعش أجر من احسن عملا…اجتهد وظبط مهاراتك ولغتك وماتقلقش لو الفرصة بعد كده إتاخرت عليك لان كل مرحلة ليها وقتها وبرده ما وصلتش لوضع كويس كده الا بعد 5 سنين تقريبا منهم سنة في معا وهي حجر الاساس..بشكر الباشمهندس وبدعيله ربنا يكرمه دايما وبدعي لكل واحد مجتهد بجد انه يحقق إلي بيتمناه وانه يصبر مع السعي…بالتوفيق