محمود السلامونى

محمود السلامونى

تاريخ القصة : 29/10/2016

السلام عليكم ورحمه الله وبركاته

بعد التحية والتقدير لشخصكم الكريم 

حبيت اعرض تجربتى فى معا وحبيت اوفى لو جزء صغير من اللى عليا لمعا واهل معا وتحديداً ملهمى بشمهندس اسامة الجوادى جزاه الله عنا جميعا كل الخير اللهم امين

رحلتى مع معا .. رحلتى مع الحياة :

هتكلم عن الماضى بتاعى اسمى محمد صبرى السلامونى من محافظة الدقهلية كنت زى زى اى شاب فى مرحلة الثانوية العامة كان حلمى ادخل كلية كبيرة واكون متفوق واكون ناجح كان ده النجاح بالنسبالى وبس , كنت دايما بدور على حلقة مفقودة فى حياتى الحلقة دى مش عارف ايه هى بس كنت دايما بحس انى ليا رسالة فى الحياة بس مش عارف ايه هى الرسالة دى وحاسس بتوهان كبير استمر حتى دخولى الكلية وتحديدا كلية تجارة انجليزى – جامعة الزقازيق كنت دايما افكر انا بعد مااتخرج هعمل ايه بالظبط اكيد هقعد على القهوة زى زى غيرى , هو انا معقول هشتغل , انا حاسس انى معرفش اشتغل ولا اعرف اعمل حاجه , عقلى الباطن كان دايما يقولى مهما عملت مصيرك هيكون زى مئات الالاف من الشباب قاعدين على القهاوى ولا شغله ولا مشغله , الا ان واحد زميلى كان مع زميله فى الجامعة عاملين نشاط مش عارف هما بيعملوا ايه اساسا طلب منى بعض التصميمات للنشاط ده وانا مش فاهم الناس دى بتعمل ايه ولا غيره بقيت اعمل التصميمات واحضر معاهم الاجتماعات وانا مش عارف ايه هو النشاط ده بمرور الوقت فهمت ده موديل او نشاط طلابى فى الجامعة كنت احد مؤسسيه من البداية هو نشاط MYG الزقازيق , زميلى ده كان دايما يقولى محمد فيه مكان اسمه فريق معا فى القاهرة روح احضر معاهم هيفيدوك جدا وانا اقوله فكك يامصطفى انا لسه هسافر من الدقهلية علشان اروح مصر وبعدين الكلام ده مابيأكلش عيش ياعم كبر دماغك , ففى مرة فاكر كويس كان فيه طلب طلبته من مصطفى فرفض يدينى الطلب ده غير لما اروح معا واحضر الاول ولو معجبنتيش الموضوع قالى هديلك فلوسك اللى سافرت بيها =D قولتله خلاص يامصطفى هروح بس حد ييجى معايا المهم قالى محلوله فيه ناس من الفريق رايحين هكلمهملك واخليك تروح معاهم قولتله تمام وروحت معا.

اول محاضرة حضرتها لفريق معا كانت فى سنة 2011 مش فاكر امتى للاسف والمحاضرة دى كانت عبارة عن الحلقة المفقودة اللى كنت بدور عليها فى حياتى دى او عرفت من خلالها الرسالة اللى كنت طول عمرى بدور عليها وحاسس انى فى اليوم ده اخدت (قلم) محترم وعنيا دمعت وانا فى البريك , بقول لزميلى اللى كان حاضر معايا سعتها هو احنا ليه منبقاش زى الناس اللى طلعت واتكلمت دى , ايه اللى ناقصنا , احنا ليه مش شايفين الفرص والنور اللى موجود هنا ده , احنا ليه مقصرين فى حق نفسنا كده , احنا ليه مش نشد الناس زى ماانا اتشديت علشان تحضر وعلشان تشوف النور اللى هنا ده , ليه وليه وليه وليه !!!!!!!!!!!!!!!!

قررت من الوقت ده افكر فى حياتى بطريقة مختلفة , عرفت انا موجود ليه ورسالتى هى ايه بالظبط وانا مطلوب منى ايه خلال الفترة الجاية واتعلمت انى ماابكيش على الوقت اللى عدى وانى اشتغل على نفسى من اللحظة اللى انا موجود فيها دى , بدأت اخطط لحياتى بطريقة مختلفة , بدأت ابص لمستقبلى بنظرة مختلفة كلها امل وتفائل وحياة , بدأت اتعرف واتصاحب على ناس مشتركين معايا فى التفكير والاحلام والسعى اللى كنا بنسعى ليه , افتكر انى بعد 3 محاضرات فى معا بس كنت مؤسس من ضمن المؤسسين لنشاط MYG فى جامعة الزقازيق , نجحت ودخلت انا والعصابة بتاعتنا فى النشاط وكلنا من الاقاليم منحة EFE للطلبة ودى كانت اول منحة للطلبة وكانت مدتها شهرين (ببلاش) اتعلمنا فيهم كتير جدا كانت منحة بيدرسلنا هناك مدربين من الجامعة الامريكية ومن امريكا كانت المنحة دى الانطلاقة ليا بعد المنحة دى كان عندنا شهر تدريب فى NGO فى وادى النطرون اسمها “واحة الصحة والأمل” اتعملت فيها الكثير من الاعمال الإدارية واتطوعت فيها فترة واحتكيت هناك بثقافات مختلفة ومنها عرفت اجيب تدريب ليا ولزميلى فى مكتب محاسبة من خلال علاقتنا بالمحاسب بتاع الواحة نفسه.

حضورنا لمعا وللنور اللى شوفناه هناك وللعقليات المحترمة اللى احتكينا بيها علمنا كتير وخلانا نقرر اننا لازم ننقل تجربة معا وتجربة العلم ده ونمشى بمبدأ البشمهندس #علم_عشرة , احنا نيتنا كنا اننا نعلم الشرقية كلها وننقلها الخير والعلم ده كله وعلشان كده اسسنا نشاط MYG وكان نيتنا اننا ناخد الناس ونسافر بيها القاهرة كمان ونخليها تشوف بعنيها النور اللى شوفناه فى معا.

بدون مقدمات من هنا الإنطلاقة ومن هنا شعلة الحماس والتأثير بفضل الله ^_^

فى سنة 2011 :

– كنت مسئول عن لجنة الـ IT فى نشاط MYG اللى كنت احدد مؤسسيه فى الوقت ده فى الزقازيق.

– كنت مسئول عن لجنة الـ IT فى نشاط من اقوى الأنشطة فى مصر والعالم نشاط SIFE وده كان حلم ليا انى ادخل فيه والحمد لله ربنا كرمنى ودخلته واتعلمت فيه الكثير كان فيه تدريبات مختلفة منها عن القيادة وعن المشاريع ..الخ فى الجامعة الامريكية , احتكاك علمنى الكتير وساعدنى فى انى ابنى شخصيتى بطريقة مميزة.

فى سنة 2012 :

– اسست انا وصديق ليا نشاط اسمه CTM كان هدفنا منه توفير محاضرات ومحاولة تأهيل الشباب لسوق العمل داخل الجامعة.

– خلال العام 2012 توليت قيادة نشاط MYG وعملنا خلال السنة دى مجموعة من المحاضرات الكبيرة اللى ساعدت شباب كتير فى تحديد مستقبلهم وده بالإستعانه بمحاضرين من القاهرة ليهم ثقل كبير جدا فى مجالاتهم الحمد لله.

– دخلت عضو فى فريق معا وكنت عضو لمدة سنة كاملة فى لجنة الـ Online Service وطبعا كان سبب انى تركت التيم هو دخولى الجيش , وكانت نيتى من دخولى فى معا فى الوقت ده هو زى ماقولت فى الانترفيو للى كانت بتعمل معايا الانترفيو لما سألتنى انت ليه عاوز تدخل من ضمن فريق معا : كان ردى انى السبب الاول علشان ارد جزء من الجميل لمعا لانه لولا معا انا مكنتش هقعد دلوقتى واتكلم معاكى , كمان رسالتى انى افيد الناس باللى اتعلمته وانى اقدر انفعهم ده كان هدفى من دخولى لمعا.

– دخلت مع زميلى مسابقة انجاز مصر – بفكرة مشروع خاصة بموضوع مهم عن الـ CSR المسئولية المجتمعية للشركات والمؤسسات , اتعلمنا فيه الكتير وكان فيه تدريبات وBoot-camp فى الجامعة الامريكية وافتكر ناس من اللى كانت بتشرحلنا ناس كانت شغاله فى موبينيل و PWC وغيرهم الكتير واتوبيس ياخدنا ويرجعنا وكله ببلاش بما يرضى الله =D.

فى سنة 2013 :

– حصلت على منحة EDU Egypt منحة وزارة الاتصالات الخاصة بالكليات النظرية ودى دخولها كان عبارة عن امتحان وانترفيو وتقدير جيد على الاقل ودرست فيها مدة حوالى 8 شهور كنا بندرس فيها انجلش وسوفت اسكيلز , كان بيدرسلنا واحد من امريكا اسمه مستر / قاسم واصى لان الجروب بتاعنا كان الاعلى من ضمن المجموعات كلها الحمد لله.

– بعدها حصلت على منحة المعهد المصرفى والخاصة بريادة الأعمال , واللى ميعرفش المعهد المصرفى هو الذراع اليمين للبنك المركزى المصرى والمنحة ببلاش كان بيدرسلنا هناك بروفيسور من بريطانيا جاى مخصوص يدرسلنا المنحة ويروح تانى , اتعلمنا فيها ازاى نعمل بيزينس بلان ناجحه , ازاى نفكر فى كل الجوانب المختلفة بتاعت المشروع ..وحاجات كتيرة …الخ.

– تم اختيارى كعضو مجلس إدارة فى جمعية طريق الخير الخيرية بالقرية عندنا وكنت احد المؤسسين للجمعية وبقيت مسئول عن لجنة العلاقات العامة فى الجمعية وحققنا نجاحات كبيرة على الصعيد الخيرى والتنموى فى القرية عندنا ومازلنا شغالين الحمد لله.

فى سنة 2014:

– سنة دخولى الجيش وسنة غيرت فى حياتى الكتير جدا وسنة من افضل السنين اللى عملت فيها انجازات على الصعيد الشخصى وعلى الصعيد المجتمعى يعنى مش سنة ضايعه على الفاضى زى ماكتير فاكر او زى ماكتير بيعمل وبيكبر دماغه فى السنة دى , سنة استمر فيها الشغل على نفسى وانى لازم اعمل حاجه لنفسى علشان ربنا يكرمنى بوظيفة كويسة اطمح ليها ترضى طموحى ان شاء الله وقد كان.

مرحلة التخطيط لسنة الجيش : الاول انا دخلت سلاح القوات الجوية وكان مركز تدريبى فى كسفريت فى اسماعيلية , بدأت مرحلة التخطيط لسنة الجيش من عمارة 19 فوق السرير فى الدور الثانى , كملخص للى خططتله : كنت مخطط خلال السنة دى انى اقرأ كتير فى السوفت اسكيلز وفى مجال السوشيال ميدايا وكنت مجهز قبل ماادخل الجيش الورق اللى هقرأ وازاكر منه فى الموضوعين دول , وكنت مجهز خطة انى اللى هتعلمه وازاكره ده هشرحه لزميلى وللناس كلها على شكل سلسلة محاضرات هتبدأ من بعد مركز التدريب على مااستقر فى وحدتى واعرف نظام اجازاتى وبناء عليه ابدأ اشتغل .. كنت حاطط قدامى رقم 1000 واحد ادربه خلال السنة دى من خلال مجموعة الكورسات والمحاضرات اللى كنت مظبطها بحيث ان كل اجازة ليا انزل اشرح فيها محاضرة وارجع ازاكر تانى فى الجيش وانزل اشرح محاضرة تانية وهكذا , دربت ناس كتيرة من خلال مجموعة محاضرات فى الزقازيق والعاشر من رمضان وبليس والدقهلية ..الخ .. كمان كنت حاطط لنفسى بلان انى اقرأ 30 كتاب فى مجال السوفت اسكيلز , كتب دينية , روايات وغيره .. كمان انى اظبط السى فى بتاعى واظبط اللينكد ان بتاعى ظبطة بنت ناس .. كمان كنت فى الجيش مقضيها تخطيط لنفسى ولمستقبلى بشكل تفصيلى وبخطط لاهدافى دى بشكل Smart وكمان كنت عامل تحليل SWOT لنفسى ومحدد كويس جدا نقاط ضعفى اللى هشتغل عليها خلاف فترة الجيش وكان منها العصبية وانى احسن من مستوى اللغة عندى وانى احسن من طرق العرض والإلقاء عندى …الخ , على الناحية الأخرى من ضمن التخطيط انى اى ايفينت هيفيدنى فى خطتى واللى انا عاوز اوصله هروح احضره حتى لو انا فى الجيش =D , واسطة بقى كنت شغال من ضمن فريق مكتب العمليات وكان شغلى مع قائد الوحدة مباشرة وكان شغلى على الكمبيوتر وموضوع اختيارى للمكان ده كان توفيق من ربنا وكان استخدامى لطريقة اسمها Elevator pitch ازاى تقنع اللى قدامك انك افضل حد للمكان ده فى اقل من دقيقتين =D , بالمناسبة انا كنت بخدم فى شمال سيناء =D رغم انى كنت فى قوات جوية , نرجع بقى لخططنا فى سنة الجيش ودى كانت على المستوى المجتمعى وقتها اسست مبادرة فى الشرقية اسمها مبادرة Experience inbound ودى فكرتها جات من نشاط MYC والايفينت الخاص بيهم وهو ايفينت بدل فاقد , جاتلى الفكرة فى الجيش انى ليه منعملش حاجه زى كده فى الشرقية وننقل الخبرة اللى اتعلمناها لبعض ونعمل ورش عمل ونجيب محاضرين كتير من كل مكان فى مصر يعلموا الناس هنا فى الشرقية وتحديدا الزقازيق وقد كان الحمد لله المبادرة نجحت نجاح كبير والا الان شغالين ومبادرتنا هى رقم 1 فى محافظة الشرقية كلها وبنحضر لايفينت قوى جدا خلال الفترة القادمة بمناسبة مرور سنة كاملة على تأسيس المبادرة .. كل ده وانا فى الجيش الحمد لله توفيق من ربنا وسعى واجتهاد .. وان ليس للإنسان الا ماسعى.

المحصلة من سنة الجيش هى:

– وصلت لهدفى ودربت 1000 مستفيد من محاضرات فى المهارات الشخصية والسوشيال ميديا.

– قريت 30 كتاب فى مجالات شتى استفدت منهم كتير جدا.

– حضرت ايفينتات كتيرة جدا خلال السنة.

– اشتغلت على نقاط الضعف كويس جدا وحسنت من نفسى فى نقاط كتيرة الحمد لله.

– ظبطت السى فى بتاعى كويس جدا وكذلك بروفايل لينكد ان وبقيت جاهز لإنطلاقة مابعد الجيش.

– غيرت بطاقتى لعنوان فى القاهرة بقى علشان فرص العمل هناك اكتير =D

– اسست مبادرة Experience inbound فى الشرقية.

– خططت لمستقبلى بطريقة كويسة مابعد مرحلة الجيش واللى خططت ليه بفضل ربنا وصلت ليه الحمد لله واكتر.

مابعد مرحلة الجيش (2015) : 

– خلصت جيش الحمد لله فى 1/12/2014 , انطلقت بعد التاريخ ده من خلال خطتى اللى كنت راسمها لنفسى وانا فى الجيش وهى انى قدمت على 5 بنوك كنت مـ Target عليهم وكانوا بنك CIB , مصر , الأهلى , الاهلى القطرى , HSBC – خلال الفترة دى كان فيه اعلان لشغل فى مؤسسة عمار الأرض للداعية مصطفى حسنى قدمت فيه وروحت عملت انترفيو واشتغلت هناك فترة 3 شهور او اقل وقتها كنت قدمت السى فى بتاعى فى البنوك اللى ذكرتها دى كلها من خلال الانترنت كان عندى يوم 12/12 امتحان فى البنك الأهلى وجالى الرد انى نجحت فيه بعد شهر وشوية كنت خلاص نجحت ودخلت بنك CIB , بعدها كان جالى انترفيو فى بنك CIB وروحت امتحان , بنك مصر كانت نزلت مسابقة محافظة الدقهلية وقدمت فيها وبعتولى , الاهلى القطرى والـ HSBC كان عندى انترفيوهات فيهم وكبرت دماغى … لانى كنت خلاص كما هو فى الخطة ربنا كرمنى يوم 1/3/2015 ونجحت فى بنك CIB مصر وهو احد اكبر البنوك الخاصة الموجودة فى مصر والشرق الأوسط بعد 4 انترفيوهات وامتحان وانا حاليا شغال فى بنك CIB فرع الزقازيق الحمد لله.

– بحضر لمبادرة جديدة بإسم Inbound your Charity بنحاول من خلالها اننا نساعد الجمعيات والفرق الطلابية والأنشطة التطوعية انها تكون اكثر فاعلية عن طريق مبدأ الـ Inbound.

فى النهاية : الشخص اللى كاتب الكلام ده مكنش هيكون ليه وجود لولا توفيق المولى عز وجل ورضاه عنى وان ربنا يسرلى طريقى وعرفنى على فريق معا وعرفنى على الصحبة الكويسة اللى اتعرفت عليها سواء فى الكلية او فى حياتى بشكل عام والفضل الاكبر للبشمهندس اسامة الجوادى جزاه الله خير الجزاء عنا جميعا وكل انسان ساعدنى فى حياتى لكم منى جزيل الشكر والتقدير .. دمتم بخير وللخير دائما

كل ما تم انجازه كان فى الفترة من 2011 – وحتى الأن ومازالت الرحلة مستمرة ومازل الإنجاز مستمر ومازال السعى مستمر بفضل الله.

هتلاقوا كل بياناتى وكل حاجه عنى من خلال:

 

Below please find my contact details

Phone: (002) 01270141874

E-mail: mo7amedelsalamony@gmail.com

Skype: mohamedsabrielsalamony

Linkedin: https://eg.linkedin.com/in/muhammadelsalamony