تقى ممدوح

تقى ممدوح

تاريخ القصة: 24/10/2016

 (كل شئ يحدث بسبب ولسبب ) … أنا مؤمنة جدا بالجملة دي جدا و معا كانت السبب لكل حاجة حلوة حصلت معايا .. إنما السبب اعتقد انه زي ماحضرتك دايما بتقولنا ان ربنا اختارنا احنا بالذات عشان نتعلم ونفع بيه غيرنا … انا سمعت عن معا من السنة اللي فاتت كنت عاوزة ادخل الدفعة اللي فاتت بس انا كنت ف جامعة بعيدة ومغتربة ف كان الموضوع صعب عليا انا قررت اقدم ف معا بعد ماتخرجت ع طول بدافع الفضول مش اكتر كنت عاوزة اعرف ايه المبهر ف المكان ده اللي بيخلي كل الناس تشكر فيه اوي كده … وقد كان 🙂 من اول محاضرة ف معا من اول كلمة حضرتك قولتها ( اهلا بيكم ف الدفعة ال 25 .. دفعة الرحلة البحرية ) وانا ايقنت ان هنا بس هيحصل التغير .. طلع ف حاجات كتييير اوي انا مكنتش اسمع عنها علم جديد اول مرة اتعلمه بكون ف قمة سعادتي لما اسمع كلام زي supply chain  marketing  HR  PR … واكون فاهماه وعارفة هما بيتكلموا عن ايه بس اهم حاجة اتعلمتها واكتر حاجة أثرت فيا      ( السعي ) .. الكلمة دي معناها طلع عظيم جدا … انا خريجة علوم بحب قسمي وكليتي وعاوزة اكمل ف مجالي بس انا كان قدامي سكك كتير ابدأ بيها بس مكنتش عارفة اختار فعلا ومكنتش محددة انا عاوزة ايه وكنت بقدم ف كذا حاجة وانا مش مهتمة … لحد ماشوفت الفيديو بتاع د وائل الفخراني وأثر فيا جدا ..قررت اني لازم ادخل المنطقة الباردة وابدأ فيها … بعد مانويت كده طبعا النية دي صفة مكتسبة من معا .. العصابة الجميلة قررت تاخدني معها معرض التوظيف ومعرض صحاري انا كنت اول مرة اروح حاجة زي كده بس اول مرة استفاد كده وبسبب معرض صحاري حد عملي ريكومندشن ف شركة وانا كنت عرفاها من ال linked in … شركة ف مجالي والحاجة اللي انا بحبها واللي كنت شايفة انه من المستحيل ابدأ بيها .. ف اول انترفيو بعد ماخلصت ال HR بيقولي انتي اكيد مش لسه خريجة مستحيل تكوني جاهزة اوي كده وكان مبسوط جدا .. ف تاني انترفيو كان هو ومدير الانتاج الل بيعملوا الانترفيو وساعتها قالي كلمة .. انتي الوحيدة من ضمن ال 10 اللي مقدمين اللي فتحتي ال website وقرأتيه وانتي الوحيدة اللي معرفناش نطلعلها حاجة غلط من السي في .. تاني يوم كانوا كلموني وقالولي انتي اتقبلتي معانا … انا اصغر واحدة ف المجال محدش مصدق اني لسه خريجة وشغالة معاهم انا دلوقتي chemical researcher  ف شركة aspira للصناعات الغذائية والدوائية .. انا بشكر حضرتك ع كل حاجة بتعملها عشانا كل حاجة اتعلمت منها الكلام التشبيهات الفيديوهات القصص اللي حضرتك بتقولها لو قعدت احكي انا اتعلمت من كل حاجة ازاي مش هبطل كلام … انا دلوقتي بدأت ف pre master ده برده كان بتشجيع حد من ال mcc ربنا يباركله ومع الشغل واخدت كورس ع كورسيرا وخلصته وبدأت ف ماتريال الانجلش من فترة كويسة .. انا اسفة لو طولت ع حضرتك بس انا كنت مستنية لما احس اني فعلا عملت حاجة تستاهل تعب حضرتك 🙂 ربنا يجازيكوا خير ع كل حرف بتعلموه لينا وينفع الناس بعلمكم … ( دامت معا لنا دائما السلام والأمل )