رحاب يسرى

يعني ايه ميمبر متطوع في معا يعني بدل ما تسأل انا ممكن استفيد ازاي من المكان ده تتحول لجزء من الكيان المعناوي ده كله تعلي ه و تعلى بيه وتبقا انت نفسك سبب في إفادة ناس كتير

من حوالي 3 سنين دخلت عيلة معا دخلت فريق ال online services MOS هدفي أساعد ناس كتير واعلمهم عشان نساعد مع بعض ناس أكتر في دايرة بتتسع دايما من علم ينتفع به وتنمية كبيرة تغير العالم ونحقق الهدف الأكبر عمارة الأرض

وعشان حظي حلو كان هيد اللجنة كريم سمارة عارف يعني ايه كريم رئيس لجنتك؟ يعني كل شوية فكرة جديدة وكل ميتنج تطبيق جديد يعني لما نفكر في شغل جديد للفريق يقولك جرب بنفسك نحط الإطار وانت بنفسك تنسج التفاصيل يرميك في البحر وفي نفس الوقت تبقا واثق انك مش هتغرق ومع الوقت بقت مسئوليتي اوصل اللي اتعلمته في لغيري من أعمدة معا المستقبليين اللي ممكن تبقا منهم ونطبقه سوا عارف لما يبقا حد تايه ومش عارف يعمل ايه ويبعت يسألك وانت بس تديله المفتاح عشان يفكر صح أو يسعى في الاتجاه الصح أو تقوله أفكار أو طرق جديدة تغير مسار حياته أو لما تساعد حد يعمل حتى إيميل أو يعرف مبادئ بسيطة عن النت أو يوصل لماتريال تفرق معاه في حياته بعد كده كأنك بتعلم طفل صغير انه يقرأ الفاتحة فكل ما يصلي طول عمره بتاخد ثوابه

عارف ممكن تحس بإيه لما حد يبعتلك يشكرك ويقولك انا اشتغلت بسببك؟ لما تلاقي نفسك سبب في فتح بيوت ناس عن طريق وظايف جمعتها أو علمت حد يجمعها من أماكن مختلفة وبسببك وصلت لناس محتاجاها عارف يعني ايه تبقا انت مصدر للمعلومات بدل ما تكون مجرد باحث عن المعلومة عارف يعني ايه تشارك في نقل فكرة معا في محافظات وبلاد بعيدة كان ممكن متوصلهمش من غيرك تخيل انك لما تتعب ومتنامش عشان تساعد ناس انت مش عارفهم وهما مش عارفينك ومش عارف مين بيستفيد من شغلك وتلاقي ربنا بيبعتلك رسايل كده تقولك كمل انت صح حد يدعيلك ويقولك نصيحتك غيرت حياتي ناس بتحبك ناس بتعتبرك قدوتها (مع اني أقل من كده  ) حاجات اتعلمتها في معا وفادتك في شغلك أكتر من ميمبر من زمايلك في الفريق اشتغل عن طريق حاجات اتعلم يطبقها واشتغل عليها بنفسه واتكلم عنها قي الإنترفيو وبسببها اتقبل كأن ربنا بيقول على قد تعبك ومساعدتك للناس بنية صادقة هيديلك وأكتر عشان “كان الله في عون العبد ما دام العبد في عون أخيه”
بتطوعك ومساعدتك للناس هتلاقي نفسك بتفيد الناس اللي حواليك والناس اللي بتحبهم وانت أول واحد بيستفيد ماديا من الفرص اللي بتلاقيها في طريقك ودي كتير أوي ومعنويا لما تحس انك فعلا فارق وليك تأثير وفايدة ده ملخص قصتي كمتطوعة في معا

بعتذر على كلامي الكتير  بس بجد ده نقطة في بحر من التجربة اللي هتعيشها بنفسك لما تدخل معا من الناحية التانية الناحية اللي فيها خلية النحل اللي بتسعى بكل نشاط عشان تقدم أكبر فايدة بمستوى عالي يفرق مع الناس بجد كميمبر وعنصر فعال بيأثر مش بس بيتأثر بقيادة ملهمنا كلنا البشمهندس أسامة مصدر الضوء اللي بننشره على قد ما نقدر ربنا يباركلك يا بشمهندس وينفع بيك دايما يا رب وكل سنة وحضرتك طيب  أهم حاجة سواء قدرت تبقا جوة معا أو من موقعك في أي مكان تاني افتكر أينما زرعك الله فأثمر