أنا أحمد شعبان أحمد، كتبت قصة نجاحي مرتين قبل كدا بس في كل مرة كنت بقول اني دخلت شركة كبيرة أو بدأت شغل في حتة محترمة، المرة دى أنا بقول حاجة مختلفة خلاص بقول اني فعلا بدأت احس انى وصلت لجزء فعلي من النجاح، أنا المرة دى وبفضل ربنا عليا ثم معًا وعلى اللى علمتهوني بدأت شركتى أنا وثلاث شركاء ليا.
القصة جات معايا من الكلام عن الريادة والرياديين فى معًا وان ازاى بيل جيتس وستيف جوبس وكل الناس كانوا ريادين كانوا بيستحملوا كل الضغوط اللى عليهم اجتماعية ومادية وكل ده وبرده مكملين، كنت بقول الناس دول مجانين لا ياعم أنا خليني فى المضمون وامشي فى الطريق اللي أنت حاطه لنفسك، كان حلمى اشتغل فى التحكم وربنا اكرمني بده وقتها وكان أكبر طموحات حياتى لو تجيلي شغلانة فى شركة بترول كبيرة عالمية أو شنيدر أو سيمنز اللى كنت كل يوم بدخل الموقع بتاعهم واشوف أسماء الوظائف ها نزلوا حاجة جديدة، أو ادور انى ازود مرتبى 500 جنيه او اعمل مبيعات جديدة.
فعلا دى كانت طموحاتى وكانت طموحات رائعة وكنت بحس بقمة النجاح لما بوصلها وفعلا فخور انى بعد شغل 6 شهور كمهندس مبيعات فى الشركة عملت تارجت أكتر من نص مليون وكانت طفرة فى الشركة وفى اللحظة دى بدأت افكر الله امال لما أنا جامد كدا ايه اللى بيخليني اعمل ده للناس ومش اعمله ليا؟
وفى نفس اللحظة دى كنت بقرأ ايميل فى معا والناس عمالة تزق يلا قدموا فى انجاز على الجروب وطبعا زيي زي أي معناوي مهووس بملي الابلكيشنز في أي حتة وفي أي مكان وفي أي زمان، قعدت وفكرت فى فكرة ادخل بيها المسابقة لمجرد التجربة فكرت مع اصحابي ولقينا فكرة وفعلا قدمنا واتقبلنا ودخلنا وهنا بدأت الحكاية .. الفكرة بدأت تتطور وبدأنا نتعرف علي ناس بتقولنا ان الفكرة اللى احنا شغالين عليها دي مش تأدية واجب دي فعلا لازم تتنفذ.
الفكرة هيا اننا بنصنع ماكينات حفر على الخشب واسمها فى السوق رواتر CNC
دى بتاخد الرسم اللى بيترسم على الكمبيوتر وبتبدأ اتوماتيك ترسمه علي الخشب أو على الحديد أو البلاستيك أو أى خامة انت حاططها.
بدأنا جديًّا نفكر ايه اللي يخلي المنتج بتاعنا متميز عن كل اللى موجود فى السوق، وعملنا ده وفى خلال وجودنا فى المسابقة اتعرفنا على ناس وصلونا بمسابقة تانية اسمها Flat6labs.
دخلناها وبالفعل ربنا اكرمنا بـ 70 ألف ودعم منهم لمدة 4 شهور وربنا أكرمنا وحاليا الشركة طلعت المنتج وبعنا 5 ماكينات.
فخور جدا اني واحد من معًا وأتمنى كل المعناوية يعملوا شركات ويكسروا بيها الدنيا.
فى الآخر بعد شكر ربنا بشكر الراجل اللى بحبه جدا يمكن يكون يعرفني شكلا لاني كنت بحضر كل المحاضرات وأنا ساكت بس أنا جيت وسألتك كذا مرة على رقم دكتور عمر شوقى يا مهندس أسامة وفعلا دلوقتي هو بيراجعلنا الخطة المالية بتاعتنا، أنا مش لاقي كلام أقولهولك أنت بجد إنسان عظيم ربنا يكرمك ويوفقك ويقدرنا ونردلك نص جمايلك دى علينا.
- دى الصفحة بتاعتنا على الفيس بوك: https://www.facebook.com/SimplexCnc?ref=notif¬if_t=page_new_likes
- حوار مع المهندس أحمد شعبان.