نجح في إنشاء شركته الجديدة Startup
أحمد شعبان يحكي قصة بدايته ونجاحه
“انا اسمى احمد شعبان احمد كتبت مرتين قبل كدا قصة نجاحى بس فى كل مرة كنت بقول انى دخلت شركة كبيرة او بدأت شغل فى حتة محترمة المرة دى انا بقول حاجة مختلفة خلاص بقول فعلا انى بدأت احس انى وصلت لجزء فعلى من النجاح انا المرة دى وبفضل ربنا ثم معا عليا وعلى اللى علمتهونى انى بدأت شركتى انا وثلاث شركاء ليا
القصة جات معايا من الكلام عن الريادة والريادين فى معا وان ازاى بيل جيتس وستيف جوبز وكل الناس كانوا ريادين كانوا بيستحملوا كل الضغوط اللى عليهم اجتماعية ومادية وكل ده وبرده مكملين كنت بقول الناس دول مجانين لا ياعم انا خلينى فى المضمون وامشى فى الطريق اللى انت حاطه لنفسك انا كان حلمى اشتغل فى التحكم وربنا اكرمنى بده وقتها وكان اكبر طموحات حياتى لو تجيلى شغلانة فى شركة بترول كبيرة عالمية او شنيدر او سيمنز اللى كنت كل يوم بدخل الموقع بتاعهم واشوف اسماء الوظائف ها نزلوا حاجة جديدة او انى ادور انى ازود مرتبى 500 جنيه او انى اعمل مبيعات جديدة
فعلا دى كانت طموحاتى وكانت طموحات رائعة وكنت بحس بقمة النجاح لما بوصلها وفعلا فخور انى بعد شغل 6 شهور كمهندس مبيعات فى الشركة عملت تارجت اكتر من نص مليون وكانت طفرة فى الشركة وفى اللحظة دى بدأت افكر الله امال لما انا جامد كدا ايه اللى بيخلينى اعمل ده للناس ومش اعمله ليا
وفى نفس اللحظة دى كنت بقرأ ايميل فى معا والناس عمالة تزق يلا قدموا فى انجاز على الجروب وطبعا زى اى معناوى مهوس بملى الابلكيشنز فى اى حتة وفى اى مكان وفى اى زمان قعدت وفكرت فى فكرة ادخل بيها المسابقة لمجرد التجربة فكرت مع اصحابى ولقينا فكرة وفعلا قدمنا واتقبلنا فيها ودخلنا وهنا بدأت الحكاية الفكرة بدأت تطور وبدأنا نتعرف على ناس بتقولنا ان الفكرة اللى احنا شغالين عليها دى مش تأدية واجب دى فعلا لازم تتنفذ
الفكرة هيا اننا بنصنع ماكينات حفر على الخشب واسمها فى السوق رواتر
CNC
دى بتاخد الرسم اللى بيترسم على الكمبيوتر وبتبدأ اتوماتيك ترسمه على الخشب او على الحديد او البلاستيك او اى خامة انت حططها
بدأنا جديا نفكر ايه اللى يخلي المنتج بتاعنا متميز عن كل اللى موجود فى السوق
عملنا ده وفى خلال وجودنا فى المسابقة اتعرفنا على ناس وصولنا بمسابقة تانية اسمها
Flat6labs
دخلناها وبالفعل ربنا اكرمنا ب70 الف ودعم منهم لمدة 4 شهور وربنا اكرمنا وحاليا الشركة طلعت المنتج وبعنا 5 ماكينات
فخور جدا انى واحد من معا واتمنى كل المعناوية يعملوا شركات ويكسروا بيها الدنيا
فى الاخر بعد شكر ربنا بشكر الراجل اللى بحبه جدا يمكن يكون يعرفنى شكلا لانى كنت بحضر كل المحاضرات وانا ساكت بس انا جيت وسالتك كذا مرة على رقم دكتور عمر شوقى يا مهندس اسامة وفعلا دلوقتى هو بيراجعلنا الخطة المالية بتاعتنا انا مش لاقى كلام اقولهولك انتا بجد انسان عظيم ربنا يكرمك ويوفقك ويقدرنا ونردلك نص جمايلك دى علينا
دى الصفحة بتاعتنا على الفيس بوك
https://www.facebook.com/SimplexCnc
أحمد شعبان بدأ واجتهد وسعى بخطوة ثم الثانية ثم الثالثة … ووصل لأعلى مما كان يتوقع عند نقطة البداية.
وأنت تستطيع. فإن لم تكن قد بدأت فابدأ الآن