تاريخ القصة: 15/10/2013
السلام عليكم ورحمة الله وبركاته
ازيك يا باشمهندس ؟؟ إن شاء الله كله يكون كويس
أنا محمد أبوالخير ، أنا حضرت معاً الدفعة الـ 16 تقريبا ، اللي بدأت في الجمعة 31 / 8 / 2012 ، واسمحلي أتكلم عن معاً بصراحه ؟؟
هو الميل طويل شويه ، لكن كان مهم جدا بالنسبه لي إني ابعته لحضرتك ، إن شاء الله حضرتك تقرأه للأخر ومتملش
:إن شاء الله كلامي كله هيدور حوالين النقاط دي
أكتر حاجات كانت بضايقني ف معاً
أكتر حاجات كانت بضايقني هي أكتر حاجات ساعدتني
أنا حلمي كان صغير قوي
معاً بالنسبه لي فتره ولازم تعدي
ازاي قدرت اكتشف إن معاً فرقت معايا
أخيرا
أكتر حاجات كانت بضايقني ف معاً :
لما كنت بسمع حضرتك بتقولنا لازم تطوعوا ف أنشطة طلابية ، ع طول كنت بقول أكيد الرجل ده عايزنا ناخد السنة ف 6 سنين
ولما حضرتك كنت بتقولنا روحوا اعملوا انترفيوا وقدموا ف منح علشان تترفضوا 100 مرة ، ع طول كنت بقول شوف الرجل اللي عايز يضحك علينا الناس ويحبطنا
ولا كله كوم ولما حضرتك كنت بتجبلنا شباب عملوا كده وفعلا نجحوا ووصلوا للي كان نفسهم يحققوه وهما شباب من سننا يعني مش من كوكب تاني مثلا ولا حاجة ، كنت ع طول بقول باينه قوي إنها فوتوشوب ومتفبركة
دا غير لما حضرتك كل شويه عايز تبعتنا ندوة شكل وكل ندوة ف مكان شكل ، والمشكلة كمان إن الندوات مكنش ليها علاقة ببعض ومكانهم بيكون سفر لبعض الناس ، ع طول كنت بقول شوف الرجل اللي عايز يمرمطنا
ولا أول ما حضرتك بدأت تقولنا ع أسامي شركات ومؤسسات علشان نروح نحضرلهم زي ” زدني ، انجاز ، اميدايست ، فولبرايت ، سيدو ، كيي ، …. ، وغيرهم ” كنت بقول الله عليك يا باشمهندس ، تبعتنا من هنا وتاخد أنت الكوميشن بتاعتك منهم من هنا “أنا أسف طبعا”
أكتر حاجات كانت بضايقني هي أكتر حاجات ساعدتني:
ورغم ده كله يابشمهندس صممت أكمل الدفعه للنهاية علشان أشوف اللي أنا كنت بسميه افتكاسات بتاعة حضرتك ، وف نهاية الدفعة قولت طيب ليه مديش الرجل الطيب ده مصداقية واجرب اللي قال عليه ؟؟؟
وكانت النتيجه
بعد ما اتطوعت ف الأنشطه اللي أنا كنت فاكرها مضيعة للوقت أصبح تقديري جيدا جدا مرتفع وأنت طالع ، وطبعا دا بعد ما كنت متعود ع النجاح ع الحروكروك ، أو اشيل مواد ، أو أدبلر مثلا
وبالنسبة لقاعدة قدم واترفض 100 مره ، أنا عايز أقول لحضرتك إن بقي أسعد لحظات حياتي ساعة ما اترفض ف حاجه كنت مقدم فيها ، طبعا أجمل لحظات حياتي لدرجة إني بقيت أعمل نوتة صغيرة واكتب كل حاجة قدمت واترفضت فيها علشان أفتخر بيه ، واللي بتقبل فيه بنساه خااااالص ، أصل لما بترفض ده بيكون معناه إني اكتشف حاجة غلط فيه وببتدي أصلح فيها ، لكن لما بنجح !!! مبعرفش إذا كان فيه مشكلة ولا لا ؟ فبالتالي مبستفدش كتير ، وع فكره باركلي يابشمهندس أنا تقريبا خلصت 65 مرة اترفضت فيهم ومبقاش كتير ع الـ100 يعني النجاح بيقرب يا بشمهندس والبركة ف ربنا سبحانه وتعالي ثم قاعدة الـ100
أما بالنسبة للشباب اللي كنت بتجبهم يكلمونا يا بشمهندس ، مطلعوش فوتوشوب ولا متفبركين ولا حاجة ، دول حقيقيين جدا لإني راسلتهم بنفسي وجربت استفسر منهم ع حاجات وفعلا مش بس كانوا بيساعدوني ، دول كانوا بيشرفوا حضرتك كمان، وكنت بحس منهم إن الخبرة اللي عندهم مش خبرة شباب ، أنا كنت بحس إني لما اتكلم مع بعض منهم كإني بتكلم مع دكتور ف الجامعة ، والله وعجزتهم بدري يابشمهندس ، أقول إيه بس ربنا يباركلهم ولاد الذين دول
أما بقى بالنسبة للندوات والإيفنتات اللي حضرتك كنت مصمم تسوحنا فيها ، تخيل يا بشمهندس أخدت خطابات توصيه من دكاترتي علشان بس لما كنت اتناقش معاهم كنت بقول كلمتين كده مش فاهم معناهم من اللي سمعتهم ف الندوات دي ، ولا المحاضرين اللي كانوا بيحضروا الندوات ، تخيل يابشمهندس لقيت العالم كله يعرفهم ونفسهم يحضرولهم ندوه واحدة ، لا وكمان بقيت محضرش محاضراتي وساعات والله المناسبات العائليه المهمة علشان بيكونوا ف مواعيد ندوات قوية
أنا الأول كنت فاكر إن حضرتك بتبعتنا الندوات نتمرمط ، لكن بعد اللي فرقته معايا الندوات بقيت دايما رافع شعار ” أنا عايز اتمرمط”و
إنما بخصوص الشركات والمؤسسات اللي حضرتك حضرتك كنت بتبعتنا عندها نتعلم منها ، أتاري حضرتك مش بتاخد منهم كوميشن زي ما كنت فاكر ، أتاري حضرتك باعتنا نتعلم وناخد فلوس كمان ، معلش بقي ياباشمهندس ظنيت وحش ف حضرتك لكن أنا عارف إن حضرتك قلبك كبير وهتسامح إن شا الله
أنا حلمي كان صغير قوي:
تخيل يا بشمهندس من بعد ما كنت بحلم أقدم ف مسابقه المسجد اللي تحتنا ، ولا اشتغل كاشير ف السوبر ماركت اللي ع أول الشارع ، دلوقتي بقيت أقدم ف مسابقات جوجل ومايكروسوفت ومعهد التعليم الدولي و … وطبعا كنت بترفض لكن بيكون شئ ممتع لما تفتح الانبوكس بتاعك تلاقي ميل من جوجل ولا مايكروسوفت ولا أميدإيست . لأن حضرتك علمتنا إن النجح هو:
الانتقال من فشل إلى فشل آخر بنفس الإصرار والعزيمة ، وإن كلما زاد الفشل قسوة كلما زاد النجاح قوة؟؟
وطبعا بقيت أقدم ع وظائف محترمة مش الهلس اللي كنت بعمله ، قال كاشير قال الله يسامحني بقى .
معاً بالنسبة لي فترة ولازم تعدي:
بالنسبه لي معا عباره عن علاج لمرض ما ، بمعني إني حسيت إن مينفعش طول حياتي أحضر معا عارف ليه ياباشمهندس ؟؟ لأن معا مش ماده هحفظها وهمتحن فيها إنما هي فكرة لو قدرت أفهمها من أول دفعة يبقى مفيش داعي أحضر الدفعة اللي بعديها لإني هكون بدأت فعلا ف رسم قصة نجاح لنفسي ، ما هو مفيش مريض بيستمر ع العلاج حتي بعد ما بيخف ، العلاج بتكون مهمته إن يعالج المريض بإذن الله ، أهو العلاج ده هو معا واحنا المرضى مينفعش نستمر ف معا طول العمر حتى بعد ما نخف ، لكن ده ميمنعش إن المريض بيحتاج لاستشارة من وقت للتاني لو حس بالمرض مرة تانية ، واحنا كمان ممكن نرجع لمعا من وقت للتاني لما نمرض باليأس والإحباط ، هنيجي ناخد جرعة أمل وتفاؤل ونرجع ننطلق من جديد
إزاي قدرت اكتشف إن معا فرقت بالنسبة لي ؟؟
كان الموضوع بسيط جدا ، افتكرت حالي قبل معا لقيت إن تقديراتي كانت شبه مقبول ، ولقيت إن ف وقت فراغي اللي هو كان عبارة عن وقتي كله رغم إني كنت شغال كنت بضيعه ف صاله بلايستيشن أو صاله بنج أو ف لعب الكورة ، ولقيت إن ف الأعياد والمناسبات كنت راشق ف الشارع والفسح والخروجات وطبعا التليفزيون والكمبيوتر كانوا قاعدة يوميه 6 او 7 ساعات . لكن بعد معا:
اكتشفت شويه حاجات كده ، خير اللهم اجعل خير إن تقديراتي من جيد جدا وأنت طالع ، وقت فراغي لو لقيته بيكون إما ف نشاط تطوعي أو بقرأ ف المكتبة ، تخيل ياباشمهندس إني بقيت بقرأ من بعد ما كنت بشوف الكتاب كنت بحس إني عايز أجيب اللي ف بطني ، وحتى التليفزيون قربت أنسى شكله ، إنما بالنسبه للأعياد والمناسبات إما بقضيها ف الشغل أو المذاكرة أو بحضر الندوات ومحاضرات بعد العيد ، تخيل يا بشمهندس إن وقت النوم نفسه اتحول من 10 أو 12 ساعة ف اليوم بقدرة قادر بقي من 3 لـ4 ساعات ف اليوم …
وآخر حاجة يا بشمهندس اللي مكنتش قادر أقتنع بيها وكنت دايما أضحك ع نفسي والتمس لنفسي العذر علشانها هي إن حضرتك كنت دايما تقول إن حتى لو شغال عمر الشغل ما هيعطلك عن الكلام ده كله ، حتى دي حضرتك غلبتنا فيها لإني فعلا شغلي حوالي 13 ساعه يوميا ومع ذلك بعمل الكلام ده كله وبحضر محاضراتي كمان … مش عارف ازاي لكن أكيد بفضل ربنا عليا أولا وأخيرا ثم حضرتك ويمكن اطبقت علينا قاعدة اليوم فيه 48 ساعه ، فاكر القاعدة دي يا بشمهندس ؟؟
أخيرا …
أنا عارف إن الميل كان طويل شويتين يا بشمهندس لكن مكنتش هرتاح فعلا غير لما ابعته لحضرتك ، وياريت يا يشمهندس متزهقش أبدا مننا ويكون عندك دايما الصبر ده لإن لسه الشباب كتير اللي طمعان ف ربنا ثم حضرتك إنك تغيرلهم حياتهم بفضل الله .
معاُ … المهندس أسامه الجوادي
أدام الله فضلكم علي مصر وشبابها
محمد أبوالخير