محمد مجدي أبو اليزيد -كليه تجارة جامعة حلوان
إزي حضرتك يا بشمهندس أسامه والله أنا مش عارف أقول لحضرتك إيه على تعب حضرتك معايا
ربنا يخليك لينا يارب أنا عارف إني تنح حبتين ورخم شويتين بس معلش
أنا بجد بعتبر حضرتك أخويا الكبير وبفخر جداً لما بسلم بس على حضرتك
بجد محدش فعلاً ممكن يتصور مدى الإعتناء اللي حضرتك بتقدمه لناس
حتى حضرتك ممكن مش تكون فاكر شكلها
أولاً أنا بفضل الله تعالى إستقريت على جدولي في الأجازه والجدول ده مجاش لوحده
لالا ده أكيد حضرتك معلمنا إنه بيجي ب 1000 ثم 100 ثم 3 باذن الله
بخلاف فريق خطوه حلوان اللامع والمزدهر بمجهودات أعضاء فريقه
إن شاء الله خلال شهر 7 هيكون في ( تدريب في الشركة الهندسية لصناعة السيارات وهي شركة مغمورة لكنها عصب صناعات السيارات في مصر وأكبر شركة تعمل في مجال الصناعات المغذية للسيارات في مصر ) بالإضافه إلى الباثواي منهج سلوكي + باثواى متقدم تنمية مهارات القيادة وبكده يكون شهر 7 إتنسف أساساً لا ولسه بليل سوزان مبارك إنجليزي كده أكون أنا نفسي إتفجرت نيجي بقه لشهر 8 وأنا قلت أخليه كله بقه حته واحده ومكان واحد عشان أركز في حاجة جامدة وبفضل الله هيكون تدريب في شركه جنرال موتورز مصرالعالمية برضة مع سوزان مبارك بليل وخطوة يوم الأجازه وحضرتك السبت طبعا من 3-7 أما شهر 9 فهو بإذن الله هيكون في شركه جونسون آند جونسون برضه وهيكون كامل في الشركه بأمر الله عشان التركيز وبليل سوزان مبارك والأجازة خطوة والسبت معاً أما عن شركة بروكتل آند جامبل أو إريال فهي أصلاً تدريبها كله 3 أيام ومبهدلينا شهر عشان نقدم وإمتحانات على النت وامتحانات PST وبهدله بس بأمانة حاجة عالية تستاهل التعب عارف بقى حضرتك إحنا عملنا إيه في الدراسة من شهر 4؟!
أنا أصلاً من زمان وأنا في سنه أولى وأنا متابع فكر التدريب لكن التدريب أبو شهادة التعبان مش تدريب معاً
جميع قطاعات الشركات اللي في مصر قدمنا فيها وإيه مش واحد ولا إتنين ولا خمسة لأ 11 واحد والله يا بشمهندس 11 نفر 10 ولاد وبنت وحيدة وإيه
إتعرض علينا كمان شغل بعد التخرج مباشرة في الهندسية بس طبعاً إتأمرنا والراجل بعد ما إتفق معانا على شهرين تدريب رحناله 15 يوم وإيه بتناكه والله ما بنتبطر عالنعمة لكن المجهود اللي بذلناه وصلنا لحاجات بجد جامدة أوي
الحمد لله قاعده أسرى بدر دي معايا من زمان لكم مكنتش بعد كنت كده وخلاص ماشي عادي من غير عداد لكن دلوقت كل أجازه الـ 10 بتوعي بيتغيروا وبفضل الله بنتقبل إحنا الـ 11 في معظم الأماكن اللي بنروحها واللي مش بيرضوا بنوديلهم 5 مننا زي إنتداب كده وييجوا تاني
إحنا الـ 11 روحنا مع بعض الهندسية وجونسون لكن شهر 8 بقى متفرقين اللي في جنرال موتورز واللي في جهينة واللي في هنكل واللي في بافاريا للسيارات وهلما جره
والله العظيم يا باشمهندس أنا جالي فعلاً تدريب في إيجا للسيارات اللي هي مرسيدس في نص شهر 8 بس مرحتش لأن جنرال موتورز برضه سيارات وجامده ( متنساش الفلوس بقى إيه إغراء بجد ) وجالي مصر المقاصة شهر 7 وهي شركة قابضة وأم البورصات في مصر ورغم كده مرحتش لأني مش بحب البورصة وشعبة إدارة أصلاً
والله يا باشمهندس أنا كان معايا رجالة شغالين من نار رجالة رجالة بجد يعني أنا بس هذكرلك اسمهم عشان يبقي أقل حاجه بقدمها ليهم
إحنا كنا 5 فرق عمل والباقي معانا برضه بس مشغولين بحاجات تانيه بص حضرتك هما
محمد صلاح محمود عثمان وده بقه إيه طلقة أكلمه الساعه 8 الصبح وأنا في 6 أكتوبر أقوله إنزل العبور عشان نلحق جونسون لأن الإدارهة في المطار يطير وواد إيه دماغ
محمد فريد عبد العزيز السيد واد شبراوي صح بس يعجبك صاروخ وحمال قاسيه لف معايا المعادي من الأول للآخر في كل شركه بترول فيكي يا مصر لحد ما جالنا تدريب في جابكو والجامعة طبعاً طمعت فيه لأن إحنا أول من دخل تدريب الشركات عندنا في الجامعة وبعدها شوف القدر سبحان الله الشركه لقوا فيها حالات أنفلونزا الخنازير غير بقى زيتكو او إستزيت بتروليم دخلنا 15 واحد من الطلبة في الجامعة مش الـ 11 بتوعي بإستمارات إحنا اللي جايبنها وشل بقى وبي بي إيجيبت وجنوب الضبعة والعالمين وكله كله
محمد كمال محمد جاد الله تاني شبراوى في فريق العمل بتاعنا وده بقى مسح وسط البلد من أبراج النيل بقى واكسون موبيل ومبيكا ومصر المقاصة وكله
شادى سيد محمد ده أكبرنا سناً وواد راسي وعاقل بس زعله أجارك الله كان مع أبو كمال في وسط البلد طبعاً غير الشركات اللي على النت وكل القرية الذكية
بس بأمانه الله حنان كانت واقفه معايا وكنت بصحيها من عز النوم الساعه 8 وكمان هيا اللي بتتصل بيا لأن أزمه الرصيد طبعاً ورايا ورايا
بجانب النساجون الشرقيون و كام 20 شركة تانية مش فاكر أسمائها بس في حاجة مهمة أوي يوم 1/4 بالضبط الساعة 8 صباحاً لازم كل شباب محاسبة 2 و 3 يروحوا بنك الإتش إس بي سي لأن بيقبل كل اللي بيجي خلال 6 أيام وبيقفل بعدها على طووووووووول آه والله لحسن إتزلينا للراجل ده
كل ده بقى كوم ومعرفة الناس كوم تاني مديرين إدارات ومديرين تسويق ومديرين تعيين حتى مدير تعيين بي آند جي أستاذ أدهم قفشناااااااااااه في مكتب العميد وطلعنا منه بحاجة
واللي يقولك في بطالة وبتاع ناس فشاره والله يا باشمهندس كنت ماشي بشوف الشركات كدة قدام عيني كاتبة جنب اليافطة بتاعتها وظائف خالية للتعيين فووووووراً وبضمانات إجتماعية
طبعاً مش هقول فين ههههههههههههههه
لا والله بس يعني إنت عارف السمكة وكدة
بس بجد السمكة طلعت كبيرة وطعمها حلو أوي
إبقى إدعيلي لإنى بحبك جداً
وبحب العيال زمايلي الـ 11 وكل التانيين بتوع خطوة
على فكره محمد صلاح برضه وباقى الشباب عندهم حكايات إيه إوعى ميه ميه انصح حضرتك تضغط عليهم وتقررهم
سلام الله عليكم ورحمتة وبركاتة