عاملين ايه يا كل ال معا
اخبارك ايه يا بشمهندس
النهاردة هقولكم على الواد اللى عامل فيها مخبر معا
مخبر معا هو اسلام
اسلام اتخرج من الثانوية بمجموع شعبى يعنى ماكنش قصادى اى جامعة
مفيش الا المعاهد الفنية اللى عن طرقها اقدر ادخل الجامعة فعلا دخلت سنتين حلوين فى المعهد بين الانشطة واتحاد طلاب
المهم ربنا وفقنى ودخلت كلية تجارة بعد المعادلة
دخلت الجامعة ولفتها كلها شرق غرب فوق تحت
وعرفت اغلب الانشطة والنماذج
ودخلت احد النماذج الخاصة بالبورصة فى كلية تجارة”SMS”
و WTO
our vision
وحاجات كتير
واتعرفت على ناس كتير وعرفت معا
الاول قولت يعنى ايه معا
ماحنا معا فى الجامعة ومعا فى المدرج معا على القهوة
المهم روحت اشوف الحكاية
اتوهمت
ايه ده مش معقققققققققققول
من هنا قررت ابقى رسول معا فى كل مكان
اى حد احس انه عايز يعمل حاجة ويفيد الناس اقوله على معا وعلى الجروب
المهم
دخلت نماذج واترفضت وبس كان بالنسبة لى عادى كنت بدخلها علشان اتمرن على المقابلات الشخصية
وكنت بأشوف الندوات اللى ممكن استفيد منها واروح
ساعات كنت باروح علشان الشهادة
بس دلوقتى بروح علشان استفيد و افهم واعرف وزى البشمهندس بيقول” وسع الرؤية”
و اتطوعت فى جمعية رسالة زى البشمهندس اسامة قالى
بجد رسالة هتفرق معاك كتير اتعرف على الناس واتعلم منهم واتعامل معهم
عايز اقولكم كمان انى دخلت كمنظم فى احدى النماذج ومنظم تبع الجامعة فى الادارة العامة لرعاية الشباب
والحمد الله طول فترتى الجامعية اخدت خبرات وعرفت ناس واتعلمت حاجات
بجد الحمدلله
فضل كبير من ربنا انك تعرف”معا” فى الوقت ده بالذات
وعلشان محدش يقول ده فاضى عنده وقت يدخل كورسات وكده
عايز اقوله…انى كنت بشتغل فى محل للبلاستيك والفويل علشان ادفع مصاريف الجامعة
والحمدلله طبقت حاجات كتير من اللى اتعلمتها
وبعد سنة واحدة كنا فتحنا مصنع للشنط والاكياس وعملنا فرع تانى للمحل
مش بقول انى السبب لكن حاول بقدر الامكان انك تتطبق اللى بتتعلمه فى حياتك
وكنت زعلان لانى مدخلتش تدريب صيفى بالرغم من انى حصلت على تدربين من الجامعة لكن مفيش نصيب
ساعتها قررت انى مش هتكلم وهاشتغل بجد
المهم كان فى رسالة عن المعارض بتتعمل فى ارض المعارض
ومن حسن الحظ ان كان فى معرض للبلاستيك قريب وتقريبا بيتعمل كل 4 او 5 سنين او على حسب ترتيب مصر
طبعا كنت بدور على الماكينات وانواعها واسعارها بقالى اكتر من شهر
روحت المعرض وكانت المفاجاة عالم تانى جوه المعارض وجنسيات مختلفة
عرفت حاجات كتير اوووووووووووى
واكبر مفاجاة
ان بفضل من ربنا جبت
تدريب فى شركة سيدى كرير”سيدبك”..ودى شركة عالمية
و تدريب فى شركة تانى مصرية
اسمها كرنوفوم
كنت مستنى لما الامتحانات تخلص
والحمدلله
بفضل ربنا ونعمته
والعلاقات الطيبة مع الناس
لقيت الشغل جانى لحد عندى
انا دلوقتى بشتغل فى جريدة سكرتير المدير المالى
ولسه
طموحى مش هيقف لحد كده
طول ما انا معا
انا كده ..انا معا
بشكر البشمهندس جدااااااااااااااا
و بشكر اسماء اووووى
وبشكر جهاد برضه اووى وبشكر كل الناس اللى بتساعد فى معا
اخوكم المخبر
فى الوقت ده كنت سكرتير النهاردة وبفضل الله وناس كتير لان طموحى موقفش زى البشمهندس ما قالى
اخوكم النهاردة ….محاسب
على فكرة مش بالتقدير لو ان التقدير مطلوب فى 99% من الشركات لكن 1% خبرتك مع البرامج وحبك لشغلك وانك تتطور من نفسك ومن شركتك وتتعلم من اغلب قصص النجاح اللى خرجت من منطلق الطموح وعدم اليأس والاصرار على الوصول
واهداء خاص الى البشمندس
وكل شباب معا
والى أ/ منى لانها وقفت جانبى كتير وساعدتنى فى حاجات كتيرررر