قصة نجاح فى الحصول على وظيفة
السلام عليكم ورحمة الله وبركاته
إزيكم جميعاً يا معاميع
أولاً أحب أشكر م/أسامة على مجهوده في معاً
وأحب أشكر جميع المعاميع القدامى اللي بيفيدونا بخبراتهم وبالأخص مازن
لأنه هو اللي ساعدني في إني ألاقي شغل وده كله طبعاً بفضل ربنا وتوفيقه لينا كلنا
إيه بقى الحكاية قولنا اشتغلت إزاي؟؟؟
لما سألت مازن وقلتله أنا لو عاوز شغل مؤقت أعمل إيه؟؟
قاللي روح برج التطبيقيين فى العباسية وهتلاقي شركات كتيرة في البرج ده قولهم
أنا عايز أقدم في الـ Call center وبعد ما تخلص تروح نقابة التجاريين اللي بعدها بخمس دقايق
مشي بس وتقدم في شركة Ecco في برج التطبيقيين قدمت الـ سي في, في Wasla واتصالات
وقالولي هنتصل بيك في خلال 10 أيام ولما روحت نقابه التجاريين في الدور العاشر قدمت الـ سي في
لقيتهم بيقولولي طب تفضل استريح وهتعمل انترفيو حالاًً والإنترفيو كان سهل ياجماعة محدش يقلق منه
هتتسأل كام سؤال كده بالإنجليزي في عشر دقايق والإتش آر هناك بيتعاطف مع الناس وبيتلكك عشان يقبلهم
ولو شافوك مؤهل بيقولولك على معاد الإنترفيو التاني في فودافون كان بعدها بيومين
وماكنتش متوقع إنه هيبقى بالسهوله دي
الإنترفيو كان 3 أسئلة في 3 دقايق وبالعربي
في نفس اليوم بالليل شركه إيكو اتصلت بيا وقالتلي حضرتك تشرفنا بكره إن شاء الله في فودافون الساعه 3
في فرع زهراء المعادي
لو أنت حتى شايف إن ده مش الكارير بتاعك قدم وخد خبره عشان تسهلك الوصول للكارير بتاعك
وربنا يوفق الجميع
AsSeM.FarrAg