تقى ممدوح
تاريخ القصة: 24/10/2016
(كل شئ يحدث بسبب ولسبب ) … أنا مؤمنة جدا بالجملة دي جدا و معا كانت السبب لكل حاجة حلوة حصلت معايا .. إنما السبب أعتقد إنه زي ماحضرتك دايما بتقولنا إن ربنا اختارنا احنا بالذات عشان نتعلم ونفع بيه غيرنا … أنا سمعت عن معا من السنة اللي فاتت كنت عاوزة أدخل الدفعة اللي فاتت بس أنا كنت ف جامعة بعيدة ومغتربة ف كان الموضوع صعب عليا أنا قررت أقدم ف معا بعد ماتخرجت ع طول بدافع الفضول مش أكتر كنت عاوزة أعرف إيه المبهر ف المكان ده اللي بيخلي كل الناس تشكر فيه أوي كده … وقد كان 🙂 من أول محاضرة ف معا من أول كلمة حضرتك قولتها ( أهلا بيكم ف الدفعة ال 25 .. دفعة الرحلة البحرية ) وأنا أيقنت إن هنا بس هيحصل التغير .. طلع ف حاجات كتييير أوي أنا مكنتش أسمع عنها علم جديد أول مرة أتعلمه بكون ف قمة سعادتي لما أسمع كلام زي supply chain marketing HR PR … وأكون فاهماه وعارفة هما بيتكلموا عن إيه بس أهم حاجة اتعلمتها وأكتر حاجة أثرت فيا ( السعي ) .. الكلمة دي معناها طلع عظيم جدا … أنا خريجة علوم بحب قسمي وكليتي وعاوزة أكمل ف مجالي بس أنا كان قدامي سكك كتير ابدأ بيها بس مكنتش عارفة أختار فعلا ومكنتش محددة أنا عاوزة إيه وكنت بقدم ف كذا حاجة وأنا مش مهتمة … لحد ماشوفت الفيديو بتاع د وائل الفخراني وأثر فيا جدا ..قررت إني لازم أدخل المنطقة الباردة وابدأ فيها … بعد مانويت كده طبعا النية دي صفة مكتسبة من معا .. العصابة الجميلة قررت تاخدني معها معرض التوظيف ومعرض صحاري أنا كنت أول مرة أروح حاجة زي كده بس أول مرة أستفاد كده وبسبب معرض صحاري حد عملي ريكومندشن ف شركة وأنا كنت عرفاها من ال linked in … شركة ف مجالي والحاجة اللي أنا بحبها واللي كنت شايفة إنه من المستحيل ابدأ بيها .. ف أول إنترفيو بعد ماخلصت ال HR بيقولي أنتي أكيد مش لسه خريجة مستحيل تكوني جاهزة أوي كده وكان مبسوط جدا .. ف تاني إنترفيو كان هو ومدير الإنتاج اللي بيعملوا الإنترفيو وساعتها قالي كلمة .. أنت الوحيدة من ضمن ال 10 اللي مقدمين اللي فتحتي ال website وقرأتيه وأنت الوحيدة اللي معرفناش نطلعلها حاجة غلط من السي في .. تاني يوم كانوا كلموني وقالولي أنت اتقبلتي معانا … أنا أصغر واحدة ف المجال محدش مصدق إني لسه خريجة وشغالة معاهم أنا دلوقتي chemical researcher ف شركة aspira للصناعات الغذائية والدوائية .. أنا بشكر حضرتك ع كل حاجة بتعملها عشانا كل حاجة اتعلمت منها الكلام التشبيهات الفيديوهات القصص اللي حضرتك بتقولها لو قعدت أحكي أنا اتعلمت من كل حاجة ازاي مش هبطل كلام … أنا دلوقتي بدأت ف pre master ده برده كان بتشجيع حد من ال mcc ربنا يباركله ومع الشغل وأخدت كورس ع كورسيرا وخلصته وبدأت ف ماتريال الانجلش من فترة كويسة .. أنا آسفة لو طولت ع حضرتك بس أنا كنت مستنية لما أحس إني فعلا عملت حاجة تستاهل تعب حضرتك 🙂 ربنا يجازيكوا خير ع كل حرف بتعلموه لينا وينفع الناس بعلمكم … ( دامت معا لنا دائما السلام والأمل )