كل سنة وأنت طيب يا أخونا وقائدنا يا بشمهندس أسامه
كل سنة وانتوا طيبين وكل سنة وانتوا معاً
أجمل حاجة حصلتلي في حياتي هي معرفتي بمعاً
استفدت من كل واحد فيهم لأن كل واحد فيه ميزة بتميزه عن التاني
و الحمد لله النعمة اللي الواحد فيها من ربنا ثم نصائحك يا بشمهندس
و كل واحد في معاً ساعدني
أنا ربنا كرمني ودخلت معاً من سنة ونصف كنت في سنة ثالثة تجارة عين شمس
طبعاً زي أغلب الناس كنت مصدوم ومش فاهم إيه اللي بيحصل
وواحدة واحدة بقيت أعرف عن الموديلز والمنح
وامتحانات الشركات والشهادات المهنية وطبعاً كل ده بفضل ربي
ثم الناس اللي ساعدوني في معاً
زي أحمد فاروق ومازن و هادي ونور الصباح و نور و مروة و محمد حبيب وشافعي
وناس تانية كتيييييير ربنا يوفقهم
ابتديت لما كنت في سنة ثالثة أدورعلى تدريب
ربنا وفقني وجبت تدريب في 3 شركات
الأول كان بالواسطة في شركة دلتا للطيران
ودي شركة أمريكية اتدربت فيها في حجز الطيران والحسابات
الثاني كان من غير واسطة في شركة مختار إبراهيم للمقاولات في التأمين
بس سبتها عشان أكمل في دلتا
الثالث كان من غير واسطة في شركه مصر للطيران وده عرفتة من إيمان ناصر ربنا يوفقها
بعدها سمعت عن نور اللي إشتغل في شركة سينوفت لبحوث التسويق من غير واسطة
سألت نور عن التقديم إزاي وروحت تاني يوم أنا واثنين صحابي
واشتغلنا احنا الثلاثة بفضل الله وده كان في سنة رابعة
وجنبها دخلت
STP وOur Vision وOne Hand وIEEE وYes We Can و MTM و DIVOS و CEDO
و الباث وايز بعضهم كنت منظم والباقي كنت باخد الكورس بس
ولما كنت شغال في سينوفت عرفت كتير أوي عن السوق
وعن فرص الشغل المتاحة في شركات أخرى
قدمت في كارفور وكان المرتب مغري بس مشتغلتش
لأن الشغل هيكون في شرم الشيخ وأنا كنت لسه طالب
واتقبلت في شركه لوجيك للتدريب في بحوث التسويق وده كان قبل الامتحانات
عشان كده منفعش برده
بعدها ربنا كرمني وخلصت الكلية بتقدير جيد لسه جديد دفعت 2010
بعد التخرج بأسبوعين اشتغلت في فندق فلامنكو بالزمالك كاشير لمده يوم واحد
وتاني يوم إشتغلت في اتصال كول سنتر إتصالات
وبعد ما ظهرت النتيجة اتصلت بيا شركة بي تك روحت الإنترفيو قبل معادي بنصف ساعة
عشان أعدي على أوليمبيك وأقدم السي ڤي
مع إن أوليميك مش بياخدوا السي ڤي إلا من الموقع
بس اتبعت قاعده زن بأدب
وعرفت إن الوظائف المتاحة سيلز قولت أقدم سيلز وبعد كده أحول من جوا الشركة
أي حاجة تانية وحددوا لي ميعاد إنترفيو الساعه 12
خلصت إنترفيو بي تك الساعه 12 ودخلت على إنترفيو أوليمبيك
والحمد لله إتقبلت في أوليمبيك بس كانت المشكلة إنهم هيشغلوني عند وكيل ليهم
مسئول عن المعارض
طبعاً مردتش وقلولتلهم إني لو هشتغل في أوليمبيك دي حاجة تشرفني
ولو هشتغل عند الوكيل مش هشتغل
وقبل ما أخرج من الشركه قدمت السي ڤي للأستاذ مهاب الأعسر
المسئول عن التعيين في القطاع المالي
بس لسة محدش رد و بعدها امتحنت محاسبة في بي تك و
عملت إنترفيو مع المدير المالي
ودلوقتي
بشتغل محاسب في بي تك و هي بردوا ضمن مجموعة شركات أوليميك جروب
وطبعا منساش أخويا محمد سليمان اللي عرفني على أوليمبيك ربنا يكرمه
وطبعاً زي ما قولت لولا نصائح البشمهندس أسامه ونصائح إخواتي في معاً
مكنتش عملت أي حاجة
وربنا يوفقني وأقدر أرد جزء بسيط من جميل معاً عليا
وأحب أنصح كل إخواتي في معا ً
إياك واليأس أبداً أبداً أبداً
تذكر دائماً كلام البشمهندس قدم في 1000 شركة عشان تقبل في واحدة
لأني قدمت في شركات كتيييييير
واترفضت الحمد لله
البلد فيها شغل كتييييير جداً وحسب إمكانياتك هتلاقي مكانك
الأنشطة التطوعية والموديلز بتفرق جامد جداً في الشغل
إقبل بأي شغل شريف حتى تجد أحسن منه
أخيراً
الإنجليزي هو مفتاح سوق العمل كلما كان أعلى زادت قيمتك بصرف النظر عن تخصصك
أخوكم محمد سليمان