ياسمين عبد المقصود

عرفت معا من الدفعة 19 واحدة صحبتى دخلتنى على جروب الياهو بدأت أعرف المنح والكورسات وبدأت أنزل واشترك فى أعمال تطوعية ومنح
دخلت معا الدفعة 25 كنت قاعدة زهقانه بصراحة لأن كل الكلام اللى بيتقال يعتبر عرفاه مع إن البشمهندس نبه وقال أى حد عارف الكلام ده قبل كده ميدخلش معا لأنها مش هتفيده بس كنت مصرة إنى أدخل واتعرف على كوكب المعنوية وكنت واثقة إنى هستفيد منها
كونا عصابة وبجد عصابة ماشاء الله عليها
فى يوم الساعة 3 بليل اقترحوا إننا ننزل معرض توظيف كانوا منزلينه على جروب معا تبع مصر تعمل
كان أغلب الوظائف سيلز وHR قلت أكيد مش هلاقى فى تخصصى وقررت مرحش
تأتى يوم صحيت على تليفون من العصابة
ولقيت 25 مكالمة لم يرد عليها وصمموا أنى أنزل المعرض
نزلت وسبحان الله تشاء الأقدار إنى ألقى شغل وفى المجال اللى عوزاه وهو مهندسة جودة فى سلسلة مطاعم شاورما الريم بعت ال cv بتاعى بعدها بأسبوع لقيت مكالمة من الشركة عشان أعمل الانترفيو فيما بعد عرفت إن المكالمة دى كانت من مدير الإدارة بنفسه بيكلمنى ويقولى أنتى لازم تيجى الانترفيو
عملت انترفيو أول مع HR وللمرة التانية على التوالى اتفاجأت الاسئلة كلها كانت نفس الأسئلة اللى البشمهندس قالها فى معا عديت الانترفيو الأول وجيت الانترفيو التانى مع المدير المفروض إنه كان يسألني أسئلة تكنكال فى المجال نفسه دخلت الانترفيو وهى كلمة واحدة اتقلتلى مبروك عليكى الشغل معانا مش محتاجة تتكلمي cv بتاعك اتكلم عنك
اليوم اللى بعده كان اجتماع مع التيم كله ورئيس مجلس الإدارة ومديرين الإدارات وتيجى هنا المفاجأة الأكبر إنى أصغر واحدة فى التيم وفى اللى موجودين كلهم
الكل بيقدم نفسه أقل واحد كان 10 سنين خبرة فى الجودة والرقابة و جيت أقدم نفسى طبعا حديثة التخرج لسه متخرجة بقالى شهرين وzero خبرة الكل كان متفاجئ من الموقف لكن المدير قال كلمة واحدة أنا براهن عليها عملت cv بتعها فى سنة واحدة وعشان كده قبلتها
ويارب أكون قد المسؤلية والمكان الى أنا فيه
وفعلا مفتاح النجاح هو كلمة ( اسعى )

حقيقى شكرا معا
شكرا بشمهندس أسامة
ربنا يجعله فى ميزان حسناتك وتفضل منارة لكل طالب علم