محمود حبيب

محمود حبيب

السلام عليكم ورحمة الله وبركاته ازيكم يا أحلى شباب عاملين إيه 🙂

يارب تكونوا بألف خير وصحة وسعادة بمناسبة الإعلان عن بدء الدفعة 15 لفريق معا

وبمناسبة وصول عدد أعضاء ل 25 ألف مستفيد بعتلكم الرسالة دى 🙂

من فترة وأنا عايز أكتبلكم الخطوات اللى بحققها فى مسيرة قصة نجاحى بس بتردد وأوقات بقول مش هتفي

د وفي الأساس إنها من وجهة نظرى إنها خطوات فى طريق النجاح لكن مقدرش أقول عليها إنها قصة نجاح

لإن قصة النجاح دي حاجة كبيرة ممكن نقولها فى نهاية مشوار حياتنا أو عند نقطة تحول جزرية فى حياتنا الاجتماعية والوظيفية

سيبكم بقى من الرغي بتاعي دا وهجيبلكم من الآخر 🙂 وأقول اللي عندي يمكن كلامي يفيد أى حد من بعدي 🙂

منا عارف الجيل البايظ دا (اللى أنا منه) اللى كبر ومتعلمش ولا حب القراءة وعايزين أى حاجة ملخصات

لا دا كمان يريت تيجى تحقق حلمه وهدفه مكانه يبقى عملت أكبر جميلة :))

طبعا فى البداية لازم أشكر ربنا وكل اللى ليه الفضل عليا وساعدني لغاية ماوصلت للى أنا فيه دلوقتى

وأولهم طبعا والدتى الله يرحمها ووالدى وخطيبتى تسنيم والمهندس أسامة مؤسس فريق معا ولكل الناس اللى ساعدونى ووقفوا جنبى عشان منساش حد

هبتدي كلامي بمقولتين مؤمن بيهم 🙂 الفرق بين الإنسان الناجح والآخرين هو ليس نقص القوة، ولا نقص المعرفة،

انما نقص الإرادة 🙂 اسأل نفسك دائماً ماذا أُريد؟ لماذا؟ إذا عرفت الإجابة جيداً سوف · تعرف كيفية الوصول إلى مرادك بسهولة ويسر ·

تعرف على نفسك جيداً · اكتشف مهاراتك وحاول تطويرها وإستغلالها جيداً · تعرف على نقاط ضعفك وحاول التغلب عليها قدر الإمكان ·

استثمر الإمكانيات والموارد المتاحة لديك بقدر الإمكان · علِّم نفسك بنفسك · إذا طُلِبَ منك إنجاز مهمة معينة, لا تقل لا أعرف,

بل دون عنوانها والمدة المطلوبة لإنجاز هذة المهمة وابدأ بالبحث عن كل البيانات والمعلومات المتاحة حسب الإمكانيات المتاحة لديك

وأعرف جيداً أنه بالمثابرة والصبر يصبح ورق التوت حريراً · كن واثقاً من نفسك · أعلم جيداً أن رزقك لن يكون لأحد غيرك ,

المهم أن تسعى للحصول عليه بإيمان ويقين وتوكل 🙂 أنا شكلي طولت عليكم …… خلاص أنا هخش فى الموضوع عالطول 🙂

أول حاجة أنا من أسرة متوسطة الحال وساكن فى بولاق الدكرور يعني منطقة شعبية زي معظم الشباب مش فى منطقة راقية وف بقي معلقة دهب:)

أنا قلت دا عشان محدش يتلكك إنه غلبان وفقير وإن أهله السبب والكلام دا كله الفقر مش عيب بس العيب إنك تفضل زى ما أنت

ومش عايز تغير نفسك وترمي عدم نجاحك على الآخرين 🙂 تعليمي تعليم حكومي من ابتدائى للجامعة ربنا يرحمها أمي لما كانت بتودينى وتجيبنى من المدرسة 🙁

خريج كلية الشعب كلية تجارة 🙂 وبجد بجد بجد فخور إنى كنت واحد منها اه متعلمناش زى باقى الخلق

بس الحمد لله طلعت منها بتقدير جيد نفعنى بعد كدا فى حياتي وشغل

ى فى هنا نقطتين عايز أوضحهم : أولا إنى كنت علمي رياضة فى ثانوي وكنت شاطر فى تانية بس تالتة وقعتنى وعشان كدة دخلت تجارة وأفتخر 🙂

بدل إنى كان نفسي أخش هندسة أو حاسبات لإني بعشق الكمبيوتر

ثانيا والأهم اوعوا تسمعوا الكلام اللي شغالين واللي عمالين يقولوا الشغل غير اللى درستوه خالص …..

لالالالا دا كل اللى اتعلمناه فى الجامعة هو اللى موجود فى الشغل بس ممكن الاختلاف فى التطبيق لكن القواعد واحدة

ودى نصيحتى ليكم ……….. ركزوا فى الكلية واتعلموا منها كويس والتقدير يا شباب والله هيفرق معاكم كتير 🙂

طبعا بعد لما اتخرجت فى 2008 كان السى فى بتاعة أبيض 🙂 وكنت محتاج تأهيل وإعداد عشان أقدر الاقى شغلانة كويسة ابدأ معاها مسيرة الحياة

خدت كورس إكسيل فى الجامعة وكان ساعتها مفيش ولا أي سى دى ال ولا الكلام دا

بس أول ما نزلت روحت اشتركت فيها وخدتها وبعدين واحد صاحبى كان فى فريق معا وعمال يقولي يابني تعالى جرب محاضرة

وأنا أقوله لا استني مش وقته راح قايلى على فريق زدنى قولت تعالى نجرب روحت سجلت وخدت الكورس الأساسى الخاص بتطوير المهارات الشخصية

وبعد لما خلصت قولت أنا لازم أروح أشوف فريق معا دا عبارة عن إيه أكيد أحسن من زدنى

ما فريق معا هو اللى دلنى على زدنى من خلال صاحبي بس قولت أجلها لغاية ما أعرف حوار الجيش فى خلال الفترة دى

أنا اتخرجت فى شهر 6 والجيش بتاعي لسه فى 11 قولت أشتغل الوقت دا إنى آخد كورس جمعية جيل المستقبل

(ودى الحسنة الوحيدة اللى كانت من النظام الفاسد بيعملها للشباب)

-بس مش معنى كدا إننا نسكت على فساده- وفيه اتعلمت حاجات كتير

وطورت الانجليزى من خلال كورس بيرلتز اللى المستوى الواحد بتاعه يعدى ألف جنيه درست أربع مستويات دا غير الكمبيوتر

وبعض المهارات الشخصية من خلال سنتر ديل كارنجى ودا كورس اليوم الواحد ب 500 ج

واتعلمت إزاى أعمل مشروع واتعلمت مهارات البيع على أصوله ( البيع الصح مش أسرح ببضاعة فى الشارع 🙂 )

بس خلصت الكورس دا في حوالى 4 شهور وساعتها كانت نتيجة الجيش ظهرت وخدت تأجيل ودلوقتى الحمد لله خدت الإعفاء النهائى

وطلعت بقى خلاص كدا أنا ظبط الانجليزى والكمبيوتر والجيش اتحدد

وخلاص بقى مش ناقص غير الشغل فاصاحبى بتاع معا

قالى تعالى بقى فى محاضرة بكرة بعنوان اقتناص الوظائف فى ساقية الصاوى أعتقد فى نص الدفعة 6 فى فريق معا كانت فى اخر 2008

روحت وحسيت بذهول بجد بعتبر المحاضرة دي لغاية دلوقتي هي أهم محاضرة فى فريق معا أنا خلاص اتعلمت وعايز أطبق اللى اتعلمته

ومعا هى اللى فتحت الباب قدامى عشان أطبق ومن ساعتها وـأنا خلاص عرفت الطريق

الطريق بكل بساطة محتاج حاجتين : معرفة قدراتك ومهاراتك وتطويرهم والحاجة التانية الهدف اللى حاطه لنفسك وقصاد عنيك عشان توصله

لو عرفت الحاجتين دول أكيد هتنجح وهتحقق اللى نفسك فيه 🙂 ومن ساعتها وأنا فى فريق معا بقالي 3 سنين

فى البداية كنت بحضر وأسمع المحاضرات بعد كدا كنت واحد من اللى بيفيدوا الشباب بالخبرات اللى اكتسبوها

استنوا دى مش دى النهاية لالالالالا

لسة بدري دي مجرد البداية بس قبل ما أكمل فى نقطتين عايز أوضحهم :

الأولى : الأنشطة التطوعية ودي بجد حاجة مهمة جدا جدا فى شخصية أي حد هتفرق معاك كتير

أنا عن نفسي كنت عضو اتحاد طلاب فى كلية تجارة وكنت قائد لأسرة الشروق فى الكلية مش بس كدا شاركت فى كذا نشاط طلابي زى نيو فيجن وكدا

التانية : استغل الأجازات الصيفية فى العمل أنا مش هتكسف أنا اشتغلت ويتر في كذا مطعم في وقت الأجازات

طيب ليه وأنت أهلك مش عايزينك تشتغل وعايزينك تعيش شبابك ولما تتخرج تبقى تشتغل اللي أنت عازه

نرجع بقى للموضوع ونشوف عملت ايه بعد انضمامى لفريق معا فى غضون شهر الحمد لله كنت لقيت شغلانة فى شركة كمبيوتك

وكانت فرصة ليا إنى أطبق كل اللى اتعلمته من إنجليزى وكمبيوتر ومبيعات

لإنى اشتغلت فى مجال المبيعات وخدت خبرة كويسة وكونت شبكة علاقات

وسبتها بعد 3 شهور وروحت شركة اكبر اسمها اسما جروب وقعدت فيها 6 شهور

وسبتها أصل مش دا المجال اللى راسمة لنفسي ولا عايز أبقى فيه عالطول بس السبب الأهم إنى اتقبلت فى منحة الاى تى اى 🙂

ودا اللى كنت بجهز ليه من وأنا لسه فى سنة 4 ومتخرجتش بس مضحكش عليكم

أنا كان كل اللي أتمناه إنى أخش منحة وزارة الاتصالات 9 شهور (MCIT)

أصلى مكنتش شايف إنى هقدر أحقق الشروط بتاعة الاى تى اى وكنت حاسس إن الاى تى أي صعب إنى أخشها

وإني مش قدها بس المهم قدمت فيها وذاكرت الاى كيو بتاع البشمهندس أسامة وعملت الاختبارات والإنترفيوهات وقولت اللي ربنا عايزه هيكون 🙂

بس النتيجة ظهرت ومنجحتش :O 🙁 بس بعديها بأسبوعين لقيتهم بيتصلوا بيا وقالولى إنى فى قائمة الانتظار وإن في ناس اعتذرت وأنت دخلت مكانهم 🙂 يااااااااااااااااااااااااااااااااه ساعتها كنت فرحان جدا وعرفت قيمة نفسى كويس دخلت الاى تى اى واتعلمت حاجات كتيييييييييييييييييييييييييييييييييييييييييييييييييييييييييييييييييييييييييييير

واتخرجت منها استشارى نظم تخطيط موارد المؤسسات ERP SAP FI/CO Consultant ودلوقتى أنا شغال فى شركة Agile Business Solutions فى مدينة نصر والحمد لله قدرت أحقق خطوات فى مشوار نجاحى وطبعا

فى نهاية كلامي زى ما ابتديت لازم أشكر ربنا وكل اللي ليه الفضل عليا وساعدنى لغاية موصلت للى أنا فيه دلوقتى

وأولهم طبعا والدتى الله يرحمها ووالدى وخطيبتى تسنيم والمهندس أسامة مؤسس فريق معا

ولكل الناس اللي ساعدونى ووقفوا جنبى عشان منساش حد 🙂

معلش أنا طولت عليكم بس يارب تستفيدوا من قصتى.

أخوكم /محمود حبيب

إن شاء الله هكون معاكم يوم الجمعة القادم فى أولى محاضرات الدفعة الجديدة